நகர சபை உறுப்பினருக்கு கொரோனா

எம்.எஸ்.எம்.நூர்தீன்

காத்தான்குடி நகர சபை உறுப்பினர் ஒருவருக்கு கொரோனா வைரஸ் தொற்று உறுதிப்படுத்தப்பட்டதையடுத்து, காத்தான்குடி நகர சபை தவிசாளர் உட்பட சில உறுப்பினர்களுக்கு அன்டிஜன் பரிசோதனை மேற்கொள்ளப்பட்டதாக காத்தான்குடி சுகாதார அதிகாரிகள் தெரிவித்தனர்.

மேற்படி உறுப்பினர் தானாக முன் வந்து அன்டிஜன் பரிசோதனையை மேற்கொண்டுள்ளார். இதன்போது அவருக்கு கொரோனா தொற்று உறுதிப்படுத்தப்பட்டது.

இதையடுத்து இவரது மனைவி மற்றும் பிள்ளைகளுக்கும் அன்டிஜன் பரிசோதனை மேற்கொள்ளப்பட்ட போது, அவர்களுக்கு தொற்று இல்லை என உறுதிப்படுத்தப்பட்டது.

அத்துடன், காத்தான்குடி நகர சபைத் தவிசாளர் எஸ்.எச்.அஸ்பர் உட்பட சில உறுப்பினர்களுக்கு அன்டிஜன் பரிசோதனை மேற்கொள்ளப்பட்ட போது, அவர்கள் எவருக்கும் தொற்று இல்லை என உறுதிப்படுத்தப்பட்டதாக சுகாதார அதிகாரிகள் தெரிவித்தனர்.

அதேவேளை, ஏனைய உறுப்பினர்களுக்கும் அன்டிஜன் பரிசோதனையை மேற்கொள்ள நடவடிக்கை எடுத்துள்ளதாகவும் சுகாதார அதிகாரிகள் மேலும் தெரிவித்தனர்.