மட்டக்களப்பில் தெடர்ந்தும் போராட்டம்

பெருந்தோட்டத் தொழிலாளர்களின் சம்பள அதிகரிப்புப் போராட்டத்துக்கு ஆதரவாக வட, கிழக்கு உட்பட நாடளாவிய ரீதியில் தொடர்ச்சியான போராட்டங்கள் முன்னெடுக்கப்பட்டு வருகின்றன.

மட்டக்களப்பு, ஆசிரிய கலாசாலையின் மாணவர்கள் இணைந்து ஏற்பாடு செய்த ஆர்ப்பாட்டமொன்று, மட்டக்களப்பு புகையிரத நிலையத்துக்கு முன்பாக இன்று (24) காலை நடைபெற்றது.

“நாட்டின் முதுகெழும்பை களையறுக்காதே”, “அடிப்படை சம்பளத்தை 1,000 ரூபாயாக மாற்று”,“மாற்றமுறும் மலையகத்துக்கு நமக்காக நாம்”, “ஒன்றிணைந்து போராடுவோம் - நாளை நமதே” போன்ற வாசகங்கள் பொறிக்கப்பட்ட பதாகைகளை, ஆர்ப்பாட்டக்காரர்கள் ஏந்தியிருந்தனர்.

நாட்டின் பொருளாதாரத்துக்கு உந்து சக்தியாகத் திகழும் பெருந்தோட்டத் தொழிலாளர்கள் தொடர்ச்சியாக தேயிலைக்கு உரமாக்கப்பட்டே வருவதாகவும் அவர்களின் வாழ்க்கை தொடர்பில் யாரும் அக்கரை செலுத்துவதில்லையெனவும் ஆர்ப்பாட்டத்தில் கலந்துகொண்டவர்கள் கவலை தெரிவித்தனர்.

மேலும், இத்தொழிலாளர்களின் கோரிக்கைகள் தொடர்ச்சியாகப் புறக்கணிக்கப்படுமானால், நாடளாவிய ரீதியில் ஆசிரிய மாணவர்களை இணைத்துப் போராடுவோம் எனவும் அவர்கள் தெரிவித்தனர்.