'காத்தான்குடி மில்லத் வீதி செப்பனிடப்பட்டுள்ளது'

-ஏ.எச்.ஏ. ஹுஸைன்

மக்கள் போக்குவரத்துச் செய்ய முடியாதவாறு சீரற்றுக் காணப்பட்ட காத்தான்குடி மில்லத் வீதி தற்போது சீர் செய்து செப்பனிடப்பட்டுள்ளது என கிழக்கு மாகாணசபை உறுப்பினர் ஷிப்லி பாறூக், சனிக்கிழமை(30)  கூறினார்.

கிழக்கு மாகாண சபை உறுப்பினர் ஷிப்லி பாறூக் எடுத்துக் கொண்ட முயற்சியினால் இது சாத்தியமாகியுள்ளது என பிரதேச மக்கள் தெரிவிக்கின்றனர்.

காத்தான்குடி மில்லத் பாடசாலை சந்தியில் உள்ள ஊர் வீதி மிகவும் மோசமாக சேதமடைந்து, மழை காலங்களில் பயணிக்க முடியாத ஓர் அவலநிலை காணப்பட்டதால் இதனூடாகப் போக்குவரத்துச் செய்வதில் மக்கள் பல அசௌகரியங்களை எதிர் நோக்கி வந்தனர்.

இந்த வீதியை உடனடியாகச் சீர் செய்யுமாறு கிழக்கு மாகாண சபை உறுப்பினர், வீதி அபிவிருத்தி அதிகாரசபைக்கு வேண்டுகோள் விடுத்திருந்தார்.

இதனைக் கவனித்தில் எடுத்துக் கொண்ட வீதி அபிவிருத்தி அதிகார சபை, தற்போது அந்த வீதிக்கு  தார் இட்டு செப்பனிட்டுள்ளதால் சனிக்கிழமை(30) தொடக்கம் பிரயாணிகளின் பயணம் இலகுவாகியுள்ளது.