ஆற்றைச் சுத்திகரிப்பதற்கு ‘பிரதேச சபைக்கு அனுமதி வழங்கவும்’

ஆ.ரமேஸ்

கந்தப்பளை பாக்குத் தோட்டத்திலிருந்து கற்பாலம் வரையிலான 4 கிலோமீற்றர் தூரமுடைய ஆற்றைச் சுத்திகரிப்பதற்கான அதிகாரத்தை, நுவரெலியா பிரதேச சபைக்கு வழங்குமாறு, நுவரெலியா மாவட்ட செயலாளரிடம் தான் அனுமதி கோரியுள்ளதாக, நுவரெலியா பிரதேச சபைத் தவிசாளர் வேலு யோகராஜ் தெரிவித்தார்.

சீரற்ற வானிலைக் காலத்தில், மேற்படி ஆறு பெருக்கெடுப்பதால், அருகிலுள்ள வீடுகளும் விவசாயக் காணிகளும் பாதிப்படைகின்றன எனவும் அவர் சுட்டிக்காட்டியுள்ளார்.

மேற்படி ஆறு, நுவரெலியா மாவட்ட செயலகத்தின் பராமரிப்பின் கீழ் காணப்படுகின்ற அதேவேளையில், நுவரெலியா பிரதேச சபைக்கு உட்பட்ட பகுதியிலேயே அமைந்துள்ளது.

காட்டாற்றைச் சுத்திகரிப்பதற்கும் அகலப்படுத்துவதற்குமான அதிகாரம், நுவரெலியா பிரதேச சபைக்கு இல்லை என்பதால், பொதுமக்களின் முறைப்பாடுகளுக்கு பதிலளிக்க முடியாத நிலை ஏற்பட்டுள்ளது என்றும், எனவே, இந்தக் காட்டாற்றைப் பராமரிப்பதற்கான அதிகாரத்தை, நுவரெலியா பிரதேச சபைக்கு வழங்குமாறு, மாவட்ட செயலாளரிடம் அனுமதிக் கோரப்பட்டுள்ளதென அவர் தெரிவித்தார்.

நேற்று முன்தினம் நடைபெற்ற சந்திப்பின்போதே, இந்தக் கோரிக்கை முன்வைக்கப்பட்டதாகவும் அவர் கூறினார்.