நுவரெலியாவுக்கு வருவோருக்கு பிசிஆர்

எஸ்.கணேசன், ஆ.ரமேஸ்

கொழும்பு உள்ளிட்ட கொரோனா ஆபத்து வலயங்களாக உள்ள பகுதிகளில் இருந்து நுவரெலியா மாவட்டத்துக்குள் வரும் அனைவருக்கும், பிசிஆர் பரிசோதனைகள் கட்டாயப்படுத்தப்பட்டுள்ளன.

இவ்வாறு வருபவர்களிடம் பிசிஆர் பரிசோதனைகள் மேற்கொள்வதன் மூலம், நுவரெலியா மாவட்டத்தில் கொரோனா வைரஸ் பரவுவதை, முடிந்தளவு கட்டுப்படுத்த முடியும் என்று சுகாதார அதிகாரிகள் தெரிவித்துள்ளனர்.

அந்த வகையில், இன்று (26) மாத்திரம், நுவரெலியா மாவட்டத்தில் 7 பேர், கொரோனா வைரஸ் தொற்றுக்கு உள்ளாகியுள்ளமை உறுதி செய்யப்பட்டுள்ளது.   

கொழும்பிலிருந்து ஹட்டன் பகுதிக்கு வருவோருக்கு, கினிகத்தேன, கலுக்கல பகுதிலும், நுவரெலியாவுக்கு வருபவர்களுக்கு, நுவரெலியா – கண்டி பிரதான வீதியின் கொத்தலை பொலிஸ் பிரிவுக்குட்பட்ட எல்பட சந்தியிலும் பிசிஆர் பரிசோதனைகள் முன்னெடுக்கப்படுகின்றன.

இந்நிலையில், நுவரெலியா மாவட்டத்தில், இன்று (26) இதுவரைக்கும் 103 தொற்றாளர்கள் இனங்காணப்பட்டுள்ளனர் என, நுவரெலியா மாவட்ட வைத்தியசாலை பணிப்பாளர் வைத்தியர் பிரதாப் சிங்க தெரிவித்தார்.

நுவரெலியா மாவட்டத்தில் மாத்திரம், இதுவரை 2,957 பிசிஆர் பரிசோதனைகள் முன்னெடுக்கப்பட்டுள்ளன என்றும் பேலியகொடை மீன் சந்தை, பிரெண்டெக்ஸ் தொழிற்சாலை மற்றும் கொழும்பில் இருந்து வந்தவர்களே, இவ்வாறு தொற்றாளர்களாக இனங்காணப்பட்டுள்ளனர் என்றும் அவர் தெரிவித்தார்.