வடிகானில் அடித்துச்செல்லப்பட்ட மாணவியின் சடலம் மீட்பு

-மொஹொமட் ஆஸிக்

கண்டி, நித்தவலை வீதியிலுள்ள வடிகானில் நேற்று(15) மாலை அடித்துச் செல்லப்பட்ட மாணவி, சடலமாக மீட்கப்பட்டுள்ளார்.

கண்டி, பதியுதீன் மஹ்மூத் மகளிர் கல்லூரியில் கல்வி கற்று வந்த  பாத்திமா அஸ்ரா சகாப்தீன் (வயது 16) என்ற மாணவியே  சடலமாக மீட்கப்பட்டுள்ளார்.

கண்டியில் நேற்று மாலை பெய்த கடும் மழைக்காரணமாக மேற்படி வீதியின் அருகேயுள்ள வடிகானிலும் வெள்ளநீர் பெருக்கெடுத்துள்ளது.

பாடசாலை முடிந்து இவ்வீதி வழியாக பயணித்த மாணவி, மழைக்கு ஒதுங்க முற்பட்டபோதே வெள்ளநீரில் அடித்துச் செல்லப்பட்டுள்ளார்.

இவரது சடலம் எலிபண்ட் பாத் பகுதியில் வைத்து கண்டெடுக்கப்பட்டுள்ளது. இதுதொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.