உண்ணாவிரதத்தில் ஈடுபட்டவர் கைது செய்யப்பட்டு பின்னர் விடுவிப்பு

மயிலிட்டி உயர் பாதுகாப்பு வலய பகுதியில் உள்ள தனது காணியை விடுவிக்குமாறு கோரி உண்ணாவிரதத்தில் ஈடுபட்டவரை, நேற்று (05) இரவு கைது செய்த காங்கேசன்துறை பொலிஸார், இன்று (06) காலை விடுவித்துள்ளனர்.

மயிலிட்டியை பூர்வீகமாகக் கொண்ட சின்னத்தம்பி யோகனந்தகுரு என்ற நபரே, கைது செய்யப்பட்டு விடுவிக்கப்பட்டுள்ளார்.

முல்லைத்தீவில் தற்போது வசித்து வரும் குறித்த நபர், மயிலிட்டியில் 54 ஏக்கர் காணி, கடந்த திங்கட்கிழமை (03) விடுவிக்கப்பட்டதையடுத்து, தன்னுடைய காணியை பார்க்க முல்லைத்தீவில் இருந்து வந்துள்ளார்.

எனினும், தற்போதும் தனது காணி, உயர் பாதுகாப்பு வலயத்துள் உள்ளதைக் கண்டு, தனது காணியையும் விடுவிக்குமாறு கோரி நேற்று உண்ணாவிரதத்தில் ஈடுபட்டார்.

இதனையடுத்து, குறித்த நபரைக் கைது செய்த காங்கேசன்துறை பொலிஸார், இன்று காலை விடுவித்துள்ளனர்.