‘டெனிஸ்வரனை நீக்குமாறான கடிதம் கிடைக்கவில்லை’

- எஸ். நிதர்ஸன், எஸ். ஜெகநாதன்

வட மாகாண மீன்பிடி, போக்குவரத்து அமைச்சரான பா. டெனிஸ்வரனை, வட மாகாண அமைச்சுப் பதவியிலிருந்து நீக்குமாறு, கடிதமேதும் தனக்குக் கிடைக்கவில்லை என வட மாகாண முதலைமைச்சர் சி.வி விக்னேஸ்வரன் தெரிவித்துள்ளார்.

யாழுக்கான விஜயமொன்றை மேற்கொண்ட, இலங்கைக்கான கனேடிய உயர்ஸ்தானிகர் ஷெலி வைட்னிங்கை, தனது வாசஸ்தலத்தில், இன்று சந்தித்துக் கலந்துரையாடிய பின்னர், ஊடகவியலாளர்களின் வினாக்களுக்கு பதிலளிக்கும்போதே, மேற்படி கருத்தை விக்னேஸ்வரன் வெளிப்படுத்தியுள்ளார்.

ரெலோவின் தலைமைக் குழுக் கூட்டம், வவுனியாவில், கடந்த ஞாயிற்றுக்கிழமை இடம்பெற்ற நிலையில், டெனிஸ்வரனை கட்சியிலிருந்து இடைநிறுத்துவதற்கு தீர்மானம் மேற்கொள்ளப்பட்டிருந்ததுடன், வட மாகாண அமைச்சுப் பதவியிலிருந்து நீக்குமாறு, விக்னேஸ்வரனுக்கு கடிதம் அனுப்பவும் முடிவெடுக்கப்பட்டதாகவும் தெரிவிக்கப்பட்டிருந்தது.