பெண்ணின் தங்கச் சங்கிலியை அபகரித்த நபருக்கு வலைவீச்சு

செல்வநாயகம் கபிலன்

சில்லாலை பண்டத்தரிப்பு பகுதியில் வீதியில் சென்ற பெண்ணின் 1 பவுண் தங்கச் சங்கிலியினை அறுத்தெடுத்துச் சென்ற சந்தேகநபரைத் தேடி வருவதாக இளவாலை பொலிஸ் நிலைய பொறுப்பதிகாரி கே.மஞ்சுல.டி.சில்வா தெரிவித்தார்.

கடந்த வியாழக்கிழமை (10), சில்லாலை பகுதியில் வீதியால் நடந்து சென்ற பெண்ணின் தங்கச் சங்கிலியை அறுத்தெடுத்துச் சென்ற சந்தேகநபர் பயன்படுத்திய மோட்டார் சைக்கிளை, பொலிஸார் சனிக்கிழமை (12) மீட்டுள்ளனர்.

கட்டுவன் மேற்கை சேர்ந்த ரூபன் (வயது 21) என்ற நபரே மல்லாகம் பகுதியில் உள்ள நண்பன் ஒருவரிடம் மோட்டார் சைக்கிளைப் பெற்று வழிப்பறியில் ஈடுபட்டமை விசாரணையில் தெரியவந்துள்ளது.

குறித்தநபர் மோட்டார் சைக்கிளில் வந்து சங்கிலியினை அறுத்தெடுத்து செல்லும் போது, சங்கிலியினை பறிகொடுத்தவர் மோட்டார் சைக்கிள் இலக்கத்தினை அடையாளம்; கண்டு பொலிஸாருக்குத் தெரியப்படுத்தியிருந்தார்.

இது தொடர்பில் விசாரணை முன்னெடுக்கப்பட்டதில் மேற்படி நபர், மல்லாகம் பகுதியில் உள்ள தனது நண்பரிடம் பெற்ற மோட்டார் சைக்கிளில் இவ் வழிப்பறி கொள்ளையில் ஈடுபட்டுள்ளதாகப் பொறுப்பதிகாரி கூறினார்.