மருமகனைக் கத்தியால் குத்திக் கொன்ற மாமனாருக்கு 7 வருடச் சிறை

கடந்த 2012ஆம் ஆண்டு, மருமகனைக் கொலை செய்த மாமனாருக்கு, 7 வருட கடூழியச் சிறைதண்டனை விதித்து, யாழ்ப்பாணம் மேல் நீதிமன்ற நீதிபதி மாணிக்கவாசகர் இளஞ்செழியன், இன்று (23) தீர்ப்பளித்துள்ளார்.

குறித்த வழக்கின் இரண்டாவது எதிரியான இறந்தவரின் மனைவியின் சகோதரனும் குற்றவாளியாக இனங்காணப்பட்டுள்ளதோடு, அவருக்கும் 5 ஆண்டுகள் ஒத்திவைக்கப்பட்ட 2 ஆண்டுகள் சிறைதண்டனை விதிக்கப்பட்டுள்ளது. இதேவேளை, மற்றொரு சந்தேக நபர், குற்றமற்றவர் என்று அறிவிக்கப்பட்டு விடுதலை செய்யப்பட்டுள்ளார்.

யாழ்ப்பாணம் ஆனைக்கோட்டை பகுதியில், இளம் குடும்பத் தலைவரான  தங்கராஜா சரத்பாபு என்பவரே, இவ்வாறு கத்தியால் குத்தி கொலை செய்யப்பட்டிருந்தார். குறித்த கொலை தொடர்பில், இறந்தவரின் மனைவியின் தந்தை, மனைவியின் சகோதரன் உள்ளிட்ட மற்றொருவர் கைது செய்யப்பட்டிருந்தனர். பின்னர், அவர்கள், யாழ். நீதவானால், பிணையில் விடுவிக்கப்பட்டிருந்தனர்.

கணவன் மனைவிக்கு இடையில் ஏற்பட்ட தகராறு காரணமாகவே,  இந்தக் கொலை இடம்பெற்றிருந்தமை குறிப்பிடத்தக்கது.