யாழ். முஸ்லிம்களின் உண்ணாவிரதம் முடிவு

(றிப்தி அலி)

யாழ்ப்பாணத்தில் மீள்குடியேற்றப்பட்டுள்ள முஸ்லிம்களுக்கு அரசாங்கத்தினால் எந்தவித அடிப்படை வசதிகளும் மேற்கொள்ளப்படவில்லை என தெரிவித்து மீள்குடியேறிய முஸ்லிம்கள் கடந்த செவ்வாய்க்கிழமை முதல் மேற்கொண்ட சாகும் வரையிலான  உண்ணாவிரத போராட்டம் இன்று வெள்ளிக்கிழமை மாலை முடிவுக்கு வந்தது.

யாழ்ப்பாண பிரதேச செயலாளர் திருமதி ரதி தேவேந்திரன், உண்ணாவிரதம் இடம்பெற்ற பிரதேசத்திற்கு விஜயம் மேற்கொண்டு வழங்கிய உறுதிமொழியையடுத்தே குறித்த உண்ணாவிரதம் கைவிடப்பட்டது.

யாழ்ப்பாணத்தில் மீள்குடியேற்றப்பட்டுள்ள முஸ்லிம்களுக்கு வழங்கப்பட்ட உணவு விநியோக முத்திரை நிறுத்தப்பட்டமை, கொடுப்பனவுகள் வழங்கப்படாமை, அரச மற்றும் அரச சார்பற்ற நிறுவனங்கள் நேரில் வந்து பார்வையிடாமை மற்றும் யாழ். பொம்மைவெளி பிரதேசத்தில் அமைந்துள்ள மதுபானசாலை மூட வேண்டும் போன்ற பல கோரிக்கைகளை முன்வைத்து உண்ணாவிரதத்தை மேற்கொண்டனர்.

கடந்த செவ்வாய்க்கிழமை முதல் சுழற்சி முறையில் உண்ணாவிரதத்தில் ஈடுபட்ட மேற்படி மக்களை, அரச உயர் அதிகாரிகள் யாரும் பார்வையிடாமையால் நேற்று வியாழக்கிழமை முதல் சாகும் வரை உண்ணாவிரத போராட்டத்தை ஆரம்பித்தனர்.

கடந்த வருட நடுப்பகுதி முதல் யாழ்ப்பாணத்தில் முஸ்லிம்கள் மீளக்குடியேற்றப்பட்டு வருகின்றமை குறிப்பிடத்தக்கது.