பெண் தொழில்முனைவோரின் ’கனவுகளுக்குச் சிறகு’ கொடுக்கும் HNB

  இலங்கையின் முன்னணி தனியார் துறை வங்கியான HNB, 2026 சர்வதேச மகளிர் தினத்தை முன்னிட்டு பெண் தொழில்முனைவோரை வலுப்படுத்தும் பாரிய விழிப்புணர்வு மற்றும் வழிகாட்டல் நிகழ்ச்சித் திட்டமொன்றை அண்மையில் HNB டவர்ஸில் நடத்தியது.

'வழங்குவதன் மூலம் ஈட்டுதல்' (Give to Gain) எனும் இவ்வாண்டுக்கான சர்வதேச கருப்பொருளுக்கு உயிர் கொடுக்கும் வகையில் அமைந்த இந்நிகழ்வில், 300க்கும் மேற்பட்ட பெண் தொழில்முனைவோர், வர்த்தகர்கள் மற்றும் கொள்கை வகுப்பாளர்கள் எனப் பலரும் கலந்துகொண்டனர்.

நிலையான வளர்ச்சிக்கான நிறுவன மூலோபாயம்

நிகழ்வில் உரையாற்றிய HNB இன் முகாமைத்துவ பணிப்பாளரும் பிரதம நிறைவேற்று அதிகாரியுமான தமித் பல்லேவத்த, பெண்களின் முன்னேற்றம் என்பது ஒரு தினத்துடன் மட்டுப்படுத்தப்படக் கூடாது என்பதை வலியுறுத்தினார்.

"நிதி அணுகலைத் தாண்டி, பெண்களுக்குத் தேவையான அறிவு, வாய்ப்புகள் மற்றும் தன்னம்பிக்கையை வழங்குவதையே எமது வங்கி நோக்கமாகக் கொண்டுள்ளது. வலுவான பெண்கள் சமூகம் இருக்கும் நாட்டிலேயே நிலையான பொருளாதார வளர்ச்சியை உறுதி செய்ய முடியும். பெண் தொழில்முனைவோருக்குப் பலமாக இருப்பதன் மூலம் இலங்கையின் புத்தாக்கம் மற்றும் தேசிய மீள்சக்தியை (Resilience) எம்மால் வலுப்படுத்த முடியும்," என அவர் தெரிவித்தார்.

பல்வேறு துறைகளின் கூட்டுப் பங்களிப்பு

பெண்களின் தொழில்முனைவுத்துவத்தை ஊக்குவிக்க அரசு மற்றும் சர்வதேச அமைப்புகளுடன் HNB கைகோர்த்துள்ளது. தேசிய வர்த்தக மேம்பாட்டு அதிகாரசபை (NEDA), ஆசிய அபிவிருத்தி வங்கி (ADB), ஜப்பான் பன்னாட்டு ஒத்துழைப்பு முகமை (JICA) மற்றும் களனி பல்கலைக்கழகம் உள்ளிட்ட பல நிறுவனங்களின் பிரதிநிதிகள் இதில் பங்கேற்றனர்.

பெண்களுக்கான விசேட வங்கிச் சேவை

தொழிலாளர் சந்தையில் பெண்களின் பங்களிப்பை அதிகரிப்பது குறித்துப் பேசிய HNB மூத்த துணைத் தலைவர் பிரியங்க விஜயரத்ன: "பெண்களின் கல்வி அறிவு உயர்ந்துள்ள போதிலும், பொருளாதாரப் பங்களிப்பு இன்னும் அதிகரிக்கப்பட வேண்டும். எமது 'பெண்கள் வங்கிச் சேவை' (HNB Women’s Banking) மூலம் அவர்களின் தொழில்முனைவோர் கனவுகளை நனவாக்கத் தேவையான வழிகாட்டல்களையும் டிஜிட்டல் கருவிகளையும் வழங்குகிறோம்," என்றார்.

சுகாதாரம் மற்றும் மனநல மேம்பாடு

வெறும் வர்த்தக ஆலோசனைகளுடன் நின்றுவிடாது, பெண் தொழில்முனைவோரின் ஆரோக்கியத்திலும் HNB கவனம் செலுத்தியது. ஆசிரி வைத்தியசாலையுடன் இணைந்து நடத்தப்பட்ட மருத்துவக் கலந்துரையாடல் மற்றும் குறிப்பாக பெண்களின் 'வாழ்க்கை சமநிலை' (Work-Life Balance) மற்றும் மனநலனை மேம்படுத்த நடத்தப்பட்ட மனோ ஆலோசனை நிகழ்ச்சி அனைவரினதும் பாராட்டைப் பெற்றது.

இலங்கையின் சிறு மற்றும் நடுத்தர அளவிலான வர்த்தகங்களின் வளர்ச்சியை விரைவுபடுத்துவதன் மூலம், டிஜிட்டல் யுகத்தில் பெண் தொழில்முனைவோரை ஒரு முக்கிய சக்தியாக மாற்ற HNB முன்னெடுக்கும் இம்முயற்சி ஒரு மைல்கல்லாகப் பார்க்கப்படுகிறது.