தேசிய உற்பத்தித்திறன் விருது வழங்கலில் நொரிடேக் நிறுவனத்துக்கு வெள்ளி விருது

நொரிடேக் லங்கா போர்சிலைன் பிரைவேட் லிமிட்டெட் (NLPL) நிறுவனமானது அண்மையில் இடம்பெற்ற 'தேசிய உற்பத்தித்திறன் விருது'  வழங்கல் நிகழ்வில் 'பெரிய உற்பத்தியாக்கல்' பிரிவின் கீழ் வெள்ளி விருதை பெற்றுக் கொண்டுள்ளது. இப்பிரிவில் தங்க விருது வழங்கப்படவில்லை என்பதால், இவ்விருதுப் பிரிவிலே ஒட்டுமொத்த வெற்றியாளராகவும் உயர் மதிப்பெண்களை பெற்ற நிறுவனமாகவும் நொரிடேக் லங்கா போர்சிலைன் பிரைவேட் லிமிட்டெட் திகழ்கின்றது. 

 

'குறிப்பிட்ட விருதுப் பிரிவில் மிகவுயர்ந்த வெற்றியாளராக எம்மை மிளிரச் செய்யும் விதத்தில் இவ்விருது கிடைத்ததையிட்டு நாம் மகிழ்ச்சியடைகின்றோம். இது எமக்கு ஊக்கமளிப்பது மட்டுமன்றி மேலும் உயர்ந்த நிலைகளை அடைவதற்கு எமக்கு ஊக்கமளிப்பதாகவும் எமது பயணத்தை இன்னும் சிறப்பாக மேற்கொள்ள வழிவகுப்பதாகவும் அமைகின்றது' என்று நொரிடேக் லங்கா போர்சிலைன் பிரைவேட் லிமிட்டெட் (NLPL) நிறுவனத்தின் பிரதித் தலைவரும் முகாமைத்துவ பணிப்பாளருமான யொசினரி சிமாயா தெரிவித்தார்.

 

உற்பத்தித் திறன் ஊக்குவிப்பு அமைச்சின் கீழியங்கும் தேசிய உற்பத்தித் திறன் செயலகத்தினால் ஏற்பாடு செய்யப்பட்ட தேசிய உற்பத்தித் திறன் விருதுகள் நிகழ்வு, மிகவும் பரந்துபட்ட விடயங்களை மதிப்பீடு செய்யும் முறைமையை அடிப்படையாகக் கொண்டதாகும். இந் நாட்டிலுள்ள உற்பத்தித்; திறன்மிக்க நிறுவனங்களின் விளைவாக உற்பத்தித் திறன்மிக்க தேசம் ஒன்று உருவாகும் என்று இப்போட்டி திடமாக நம்புகின்றமையால், அனைத்து மட்டங்களிலும் உற்பத்தித் திறனை மேம்படுத்துவதே இதன் முதன்மையான நோக்கமாக காணப்படுகின்றது. 

 

சிலோன் செரமிக் கூட்டுத்தாபனம் மற்றும் நூறு வருடங்கள் பழமைவாய்ந்த ஜப்பானின் நொரிடேக் கொம்பனி லிமிட்டெட் ஆகிவற்றின் ஒரு கூட்டு முயற்சிக் கம்பனியாக 1972ஆம் ஆண்டு ஸ்தாபிக்கப்பட்ட NLPL ஆனது, இன்று இலங்கையின் முன்னோடி மேசைப் பீங்கான் (போர்சலைன்) பாத்திரங்கள் உற்பத்தி கம்பனியாக முக்கியத்துவமிக்க அந்தஸ்தை பெற்றிருக்கின்றது. 

 

1972ஆம் ஆண்டில் 150 பேரைக் கொண்ட ஆளணியுடன் தனது தொழிற்பாட்டை ஆரம்பித்த இந்த தொழிற்சாலை கடந்த பல வருடங்களில் 1200 திறனுள்ள தொழிலாளர்களைக் கொண்டதாக வளர்ச்சி அடைந்துள்ளது. இத் தொழிற்சாலையில் பணியாற்றும் அதிகமான தொழிலாளர்கள், மேற்பார்வையாளர்கள் மற்றும் முகாமையாளர்களுக்கு தத்தமது தொடர்புடைய துறைகள் தொடர்பில் ஜப்பானில் பயிற்சி அளிக்கப்பட்டுள்ளது. 

 

ஜப்பானிய நிபுணத்துவத்திற்கு மேலதிகமாக, இதனது முகாமைத்துவ நடைமுறைகளுக்கு இலங்கை தர நிறுவகத்திடமிருந்து கிடைக்கப் பெற்ற ISO 9001:2008 தரச் சான்றுபடுத்தல் ஆதரவளிக்கின்ற அதேவேளை, சர்வதேச நன்நெறிமுறைகளுக்கு இணங்கியும் தொழிற்படுகின்றது. மாத்தளையில் அமைந்துள்ள தொழிற்சாலையானது உலகளவில் காணப்படும் மிகப் பெரிய உற்பத்தியாக்கல் வசதிகளுள் ஒன்றாக திகழ்வதுடன், நொரிடேக் (Noritake) வர்த்தக குறியீட்டின் கீழ் உயர்தரமிக்க மேசைப் பாத்திரங்களை உற்பத்தி செய்து வருகின்றது.