அகில இலங்கை மக்கள் காங்கிரஸ் கட்டுப்பணம் செலுத்தியது

-எஸ்.றொசேரியன் லெம்பேட்

எதிர்வரும் உள்ளூராட்சிமன்றத் தேர்தலில், மன்னார் மாவட்டத்தில் போட்டியிடுவதற்காக, ஐக்கிய தேசியக் கட்சியுடன் இணைந்து அகில இலங்கை மக்கள் காங்கிரஸ் கட்சி, மன்னார் தேர்தல் அலுவலகத்தில் இன்று (18), கட்டுப்பணத்தைச் செலுத்தியது. 

அகில இலங்கை மக்கள் காங்கிரஸின் தலைவரும் அமைச்சருமான ரிஷாட் பதியூதினின் இணைப்புச் செயலாளர் றிப்கான் பதியுதீன் தலைமையில், கட்டுப்பணம் செலுத்தப்பட்டது. 

இதன்போது, வடமாகாண சபை உறுப்பினர் அலிக்கான் செரீப், அமைச்சரின் செயலாளர் முஜாகிர், ஐக்கிய தேசியக் கட்சியின் மாவட்ட அமைப்பாளர் ஏ.எஸ்.ம்.பஸ்மி ஆகியோரும் சென்றிருந்தனர். 

இதற்கமைய, மன்னார் நகர சபை, மன்னார் பிரதேச சபை, நானாட்டான் பிரதேச சபை, முசலி பிரதேச சபை, மாந்தை மேற்குப் பிரதேச சபை, ஆகிய 5 உள்ளூராட்சிமன்றங்களில் போட்டியிடுவதற்காக கட்டுப்பணம் செலுத்தப்பட்டது.

இதேவேளை, மன்னார் மாவட்டம் மாந்தை மேற்குப் பிரதேச செயலாளர் பிரிவில் மாத்திரம் போட்டியிடுவதற்கு, சுயேட்சை குழு ஒன்று, இன்று (18) காலை, மன்னார் தேர்தல் அலுவலகத்தில் கட்டுப்பணத்தைச் செலுத்தியது. 

சுயேட்சைக்குழுவின் பொது வேட்பாளர் நிகால் நிர்மலராஜ் தலைமையில் கட்டுப்பணம் செலுத்தப்பட்டமை குறிப்பிடத்தக்கது.