பூநகரியில் 490.1 கிலோமீற்றர் வீதி புனரமைக்க வேண்டியுள்ளது

-சுப்பிரமணியம் பாஸ்கரன்

கிளிநொச்சி - பூநகரி பிரதேசத்தில் 490.1 கிலோ மீற்றர் நீளமான உள்ளக வீதிகள் புனரமைக்க வேண்டிய தேவையுள்ளதாக பூநகரி பிரதேச செயலகப் புள்ளி விபரத்தில் தெரிவிக்கப்பட்டுள்ளது.

பூநகரியிலுள்ள 612.64 கிலோ மீற்றர் நீளமான 435 உள்ளக வீதிகள் உள்ளன. இவற்றில் 122.54 கிலோமீற்றர் நீளமான 48 வீதிகள் புனரமைக்கப்பட்டுள்ளன. மிகுதி 490.1 கிலோ மீற்றர் 387 வீதிகள் புனரமைக்கவேண்டிய தேவையுள்ளன.

கிளிநொச்சி மாவட்டத்தின் மிகவும் பின்தங்கிய பிரதேசமாக காணப்படும் பூநகரி பிரதேசத்தில் பெருமளவான உள்ளக வீதிகள் புனரமைக்கப்படாத நிலையில் காணப்படுகின்றன.

குறிப்பாக பூநகரி - பரந்தன் வீதியிலிருந்து கறுக்காய் தீவு செல்லும் வீதி புனரமைக்கப்படாமையினால் பெருமளவான குடும்பங்கள் பெரும் சிரமங்களை எதிர்கொண்டு வருகின்றன.

இதேபோன்று, வினாசியோடை, கௌதாரிமுனை உள்ளிட்ட பகுதிகளில் பிரதான வீதிகளும் மிகமோசமான நிலையில் காணப்படுகின்றன.

இதனால் மிகவும் பின்தங்கிய கிராமங்களில் வாழும் ஏராளமான குடும்பங்களும் தமது போக்குவரத்துக்களில் சிரமங்களை எதிர்கொள்கின்றன.