மூன்றுமுறிப்பு கிராமத்தில் அரிசி ஆலை நிர்மாணம்

-சுப்பிரமணியம் பாஸ்கரன்

முல்லைத்தீவு, மாந்தை கிழக்கு பிரதேச செயலகத்துக்கு உட்பட்ட மூன்றுமுறிப்பு கிராமத்தில் வடமாகாண போக்குவரத்து, வர்த்தக வாணிப மற்றும் கிராமிய அமைச்சால் 1.4 மில்லியன் ரூபாய் செலவில் அரிசி ஆலையொன்று அமைக்கப்பட்டு வருவதாக அமைச்சின் தகவல்கள் தெரிவிக்கின்றன.

முல்லைத்தீவு மாவட்;டத்தில் மிகவும் பின்தங்கிய பிரதேசமாக காணப்படும் மூன்றுமுறிப்பு கிராமத்தில் இப்பகுதி மக்களின் தேவைகளை நிறைவு செய்யும் வகையில் இந்த அரிசி ஆலை அமைக்கப்பட்டு வருகின்றது.

நவீன முறையில் அமைக்கப்படவுள்ள இந்த அரிசி ஆலைக்கான ஆரம்பகட்ட வேலைகள் மேற்கொள்ளப்பட்டு வருகின்றன.

இந்த அரிசி ஆலை அமைப்பதன் மூலம் மூன்று முறிப்பு, இளமருதன்குளம் பனங்காமம், கொம்புவைத்தகுளம் ஆகிய பகுதிகளையும் வவுனியா வடக்கு, நவ்வி குஞ்சுக்குளம், நவ்வி, பாலமோட்டை, மடத்து விளாங்குளம் ஆகிய பகுதிகளையும் சேர்ந்த மக்கள் நன்மையடைவார்கள் என அமைச்சின் தகவல்கள் மேலும் தெரிவிக்கின்றன.