'நட்புன்னா என்னன்னு தெரியுமா உனக்கு?'

ஏற்கெனவே ரஜினியின் புகழ்பெற்ற வசனமான 'எனக்கு இன்னொரு பேர் இருக்கு' என்ற வசனத்தைத் தலைப்பாகக் கொண்டு ஒரு திரைப்படம் அண்மையில் வெளியாகிய நிலையில் தற்போது ரஜினி திரைப்பட வசனத்தையே தலைப்பாகக் கொண்டு இன்னொரு திரைப்படம் உருவாக்கப்படவுள்ளது.

ரஜினி மற்றும் மம்முட்டி நடித்த 'தளபதி' திரைப்படத்தில் 'நட்புன்னா என்னன்னு தெரியுமா உனக்கு?' என்று ரஜினி, மம்முட்டியிடம் ஒரு வசனம் பேசியிருப்பார். இந்தப் புகழ்பெற்ற வசனமான 'நட்புன்னா என்னன்னு  தெரியுமா?' என்ற தலைப்பில் தற்போது ஒரு திரைப்படம் உருவாகவுள்ளது.

பீட்சா, சேதுபதி உட்பட பல திரைப்படங்களில் நடித்த ரம்யா நம்பீசன் இந்தத் திரைப்படத்தின் நாயகியாகவும் இவருக்கு ஜோடியாகத் தொலைக்காட்சியில் வர்ணனையாளராகப் பணிபுரிந்த கவினும் நடிக்கவுள்ளனர்.

நெல்சனின் உதவியாளர் சிவகுமார் இயக்கவுள்ள இந்தத் திரைப்படத்துக்கு தரண் இசையமைக்கவுள்ளார். லிப்ரா புரொடக்ஷன்ஸ் மற்றும் வனிதா பிக்சர்ஸ் இணைந்து தயாரிக்கும் இத்திரைப்படத்தின் படப்பிடிப்பு விரைவில் தொடங்கவுள்ளது.