அசினுக்கு 'ஷாக்' கொடுத்த த்ரிஷா...

திரையுலகில் ஒருவருக்கு கிடைக்கும் வாய்ப்பு மற்றொருவர் தட்டிப் பறிப்பதும் பறிபோவதென்பதும் சகஜமாகிவிட்ட விடயம். அந்தவகையில் அண்மைக்காலமாக த்ரிஷாவுக்கு கிடைக்கும் வாய்ப்புகளை அசினும் அசினுக்கு கிடைக்கும் வாய்ப்புக்களை த்ரிஷாவும் தட்டிப்பறிக்கும் நிலைமை தலையெடுத்திருந்தது.

திரையுலகில் மாத்திரமே இருந்த இந்த போட்டியினால் ஒருவருக்கொருவர் சலித்துப் போகாமல் கிடைக்கும் வாய்ப்புக்களை சிறந்தமுறையில் பயன்படுத்தி வந்தார்கள்.

ஆனால் இம்முறை த்ரிஷாவால் ஷாக்காகியிருக்கிறார் அசின். இலட்சம் இலட்சமாகக் கொட்டும் அழகுசாதனப் பொருள் விளம்பர வாய்ப்பொன்றை த்ரிஷா தட்டிப்பறித்துக்கொண்டதால்தானாம் அசினுக்கு இந்த ஷாக்.

பிரபலமான அழகு சாதனப்பொருள் விளம்பரமொன்றில் நீண்ட நாட்களாக அசின் நடித்து வந்தார். இதற்காக அவர் பெரும் தொகையை சம்பளமாக வாங்கியும் வந்தார்.

தற்போது அந்த வாய்ப்பை த்ரிஷா தட்டி பறித்துள்ளார். கடந்த வாரம் இதற்கான படப்பிடிப்பு நடந்துள்ளது. இப்போது அந்த அழகுசாதனப் பொருளுக்குப் பக்கத்தில் த்ரிஷா சிரிப்பது போல விளம்பரங்களும் வெளியாகிவிட்டன. அசினுக்கு இது அதிர்ச்சியைக் கொடுத்துள்ளது.

இலங்கையில் படப்பிடிப்பு நடந்ததை அடுத்து தொடர்ந்து பல வாய்ப்புகளை இழந்து வருகிறார் அசின். அதில் முக்கியமானது ரஜினிக்கு ஜோடியாக ராணாவில் நடிக்க வந்த வாய்ப்பு. கே.எஸ்.ரவிக்குமார், அசினை ஒப்பந்தம் செய்ய பரிந்துரைத்தும், ரஜினி வேண்டாம் என்று கூறிவிட்டாராம்.

இப்போது முக்கிய விளம்பர வாய்ப்பும் பறிபோயுள்ளது. ஆனால் இதற்குக் காரணம் அசினின் இலங்கைப் பயணமா அல்லது வேறெதுவுமா என்பது குறித்து இதுவரையில் தகவல்கள் வெளியாகவில்லை. என்னதான் காரணமாக இருந்தாலும் அசினுக்கு இது பேரிழப்புதான்.