பெயர் மாறிய 'தெய்வ திருமகன்'

குழந்தைத் தனமான நடிப்பில் விக்ரம் அசத்தியிருக்கும் 'தெய்வ திருமகன்' படத்தினுடைய பெயரை மாற்றுவதற்கு தீர்மானித்திருப்பதாக அப்படத்தின் தயாரிப்பாளர் அறிவித்துள்ளார்.

'தெய்வ திருமகன்' படப்பிடிப்புகள் நிறைவுபெற்று படம் திரைக்குவரும் தறுவாயில் இருக்கின்ற சந்தர்ப்பத்தில் தேவர் சமூகம் போர்க்கொடி தூக்கியிருந்தது. பசும்பொன் முத்துராமலிங்க தேரர் என்பவரை தெய்வ திருமகன் என்றுதான் அழைப்பார்களாம். அவருடைய பெயரை அவமதிக்கும் விதத்தில் விக்ரமின் படத்திற்கு 'தெய்வ திருமகன்' என்று பெயர் வைத்திருக்கிறார்கள் என்று கூறி நடிகர் விக்ரமின் வீட்டிற்கு முன்னால் ஆர்ப்பாட்டத்தில் ஈடுபட்டனர் சிலர். அவர்களை பொலிஸார் கைதுசெய்துமிருந்தனர்.

இந்நிலையில் ஆர்ப்பாட்டக்காரர்களுடன் சமரச பேச்சுவார்த்தையில் ஈடுபட்ட படத்தின் தயாரிப்பாளர் குறித்த படத்தின் பெயரை மாற்றுவதாக அறிவித்துள்ளார். 'விக்ரமனின் தெய்வ திருமகள்' என்று புதிய பெயர் சூட்டியுள்ளதாகவும் அவர் அறிவித்துள்ளார்.

அனைவரது எதிர்பார்ப்பினையும் தன்வசப்படுத்தியிருக்கும் விக்ரமின் புதிய படத்திற்கு இப்படியொரு குழப்பம் வந்ததில் ரசிகர்கள் குழம்பிப்போயுள்ளார்கள். இருப்பினும் திட்டமிட்டபடி படம் திரைக்கு வருமெனவும் எதிர்பார்க்கப்படுகிறது.