எதிர்காலத்தில் அரசியலுக்கு வரலாம்-விஜய்

அரசியலில் ஈடுபடுவதற்கான திட்டம் எதுவும் தற்போது இல்லை. இருப்பினும் எதிர்க்காலத்தில் முழு நேர அரசியலில் ஈடுபடுவது நடக்கக்கூடும் என்று விஜய் தெரிவித்துள்ளார்.

தமிழகத்தில் நடந்துமுடிந்த சட்டமன்ற தேர்தலில் அ.தி.மு.க. அமோக வெற்றி பெற்றுள்ளது. இத்தேர்தலில் நடிகர் விஜய்யின் மக்கள் இயக்கம் அ.தி.மு.க.வுக்கு ஆதரவாக பிரசாரத்தில் ஈடுபட்டது. இந்நிலையில் தேர்தல் வெற்றி தொடர்பில் ஊடகங்களுக்கு பேட்டியளித்துள்ள அவர் மேலும் தெரிவித்துள்ளதாவது,

தேர்தலில் அ.தி.மு.க. வெற்றி பெறும் என்று நான் உறுதியாக நம்பினேன். ஆனால் இந்த அளவு மகத்தான வெற்றி கிடைக்கும் என்று எதிர்பார்க்கவில்லை. மிகவும் சந்தோஷமாக இருக்கிறேன். ஜெயலலிதா மீண்டும் முதலமைச்சரானதில் மகிழ்ச்சியடைகிறேன்.

சமூகத்தின் பலதரப்பு மக்களும் மாற்றத்தை விரும்பினர். நாட்டுக்கு ஒரு மாற்றம் தேவைப்பட்டது. மக்களின் வாக்களிப்பு அதனை எடுத்துக்காட்டியுள்ளது. நான் மட்டுமின்றி மாநில மக்கள் அனைவருமே ஜெயலலிதா மீண்டும் ஆட்சிக்கு வர உறுதுணையாக இருந்தார்கள்.

தேர்தலில் எங்களின் மக்கள் இயக்கமும் ரசிகர்களும் கடுமையாக உழைத்தார்கள். நான் வேண்டுகோள் விடுத்ததற்காக இரவு - பகலாக பணியாற்றினார்கள். அவர்களுக்கு நன்றி கூறிக்கொள்கிறேன்.

சில காலத்துக்குப் பிறது முழுநேர அரசியலில் ஈடுபட வாய்ப்புண்டு. ஆனால் தற்போது அதற்கான திட்டம் இல்லை. ஜெயலலிதாவுக்கு எனது வாழ்த்துக்களை தெரிவித்துக் கொள்கிறேன்' என்று கூறியுள்ளார் விஜய்.