த்ரிஷாவின் கருணை உள்ளம்...

தெரு நாய்களைத் தத்தெடுத்து வளர்க்குமாறு பொதுமக்களை வலியுறுத்தும் விளம்பரமொன்று நாளை வெளியிடப்படவுள்ளது. இதில் நடிகை த்ரிஷா நடித்துள்ளார். தெரு நாய்கள் மீது அவர் கொண்டுள்ள இரக்கத்தை அடிப்படையாகக் கொண்டே இந்த விளம்பரம் தயாரிக்கப்பட்டுள்ளது.

அண்மையில் ஹைதராபாத்தில் படப்பிடிப்புக்காகச் சென்றுகொண்டிருந்த த்ரிஷா, வீதியோரம் அடிபட்டு கிடந்த நாய்க்குட்டியொன்றை எடுத்துச் சென்று வைத்தியசாலையில் அனுமதித்து சிகிச்சையளித்தார். அத்துடன், படப்பிடிப்பை முடித்துக்கொண்டு மீண்டும் சென்னை திரும்பிய அவர் அந்த நாய் குட்டியை தன்னோடு அழைத்துச் சென்று வீட்டில் வைத்து பராமரித்து வருகிறார்.

இந்த சம்பவத்தை அடுத்து வீதியோரங்களில் இருக்கும் நாய்களை தத்தெடுத்து வளர்க்குமாறு அனைவருக்கும் ஆலோசனை வழங்கி வந்துள்ளார் த்ரிஷா. அவரது இந்த அக்கறையைப் பார்த்த பிராணிகள் நல அமைப்பு த்ரிஷாவை இந்திய அளவிலான விளம்பர தூதுவராக நியமித்துள்ளது.

இது குறித்து த்ரிஷா கூறுகையில், 'நிறைய வீடுகளில் நாய்கள் வளர்க்கின்றனர். பெரும்பாலானோர் நாய்களை காசு கொடுத்து வாங்கி வளர்க்கிறார்கள். அப்படி செய்யக்கூடாது. தெரு நாய்களும் நல்ல நாய்கள்தான். அவற்றை தத்து எடுத்து வளர்க்க வேண்டும். நிறைய இடங்களில் தெரு நாய்கள் ஆதரவின்றி சுற்றித் திரிக்கின்றன. அவற்றை ஒவ்வொருவரும் வீட்டுக்கு எடுத்து போய் வளர்க்க வேண்டும்' என்றார்.