’குஷ்’ ’ஹஷிஷ்’ போதைப்பொருளுடன் 22 பிக்குகள் கைது

கட்டுநாயக்க பண்டாரநாயக்க சர்வதேச விமான நிலையத்தில் 1.1 பில்லியன் ரூபாவிற்கும் அதிக பெறுமதியுடைய பெருமளவிலான போதைப்பொருட்களுடன் 22 பௌத்த பிக்குகள் கைது செய்யப்பட்டுள்ளனர்.

கிடைக்கப்பெற்ற இரகசியத் தகவலின் அடிப்படையில், பொலிஸ் போதைப்பொருள் தடுப்புப் பிரிவினர் சனிக்கிழமை இரவு முன்னெடுத்த விசேட சோதனையின் போதே இந்தக் கைது நடவடிக்கை இடம்பெற்றுள்ளது.

இவர்களிடமிருந்து சுமார் 110 கிலோகிராம் எடையுடைய 'குஷ்' (Kush) மற்றும் 'ஹஷிஷ்' (Hashish) ஆகிய போதைப்பொருட்கள் கைப்பற்றப்பட்டுள்ளன.

கைது செய்யப்பட்டவர்களின் பயணப் பொதிகளைச் சோதனையிட்டபோது, அவற்றில் இரகசிய அறைகள் (False Bottom) இருப்பது கண்டறியப்பட்டது. பாடசாலை உபகரணங்கள் மற்றும் இனிப்புப் பண்டங்களுக்கு நடுவே மிக நுணுக்கமாக இந்தப் போதைப்பொருட்கள் மறைத்து வைக்கப்பட்டிருந்தன.

ஒவ்வொரு பிக்குவும் தலா 5 கிலோகிராமுக்கும் அதிகமான போதைப்பொருளை எடுத்து வந்துள்ளதாக ஆரம்பகட்ட விசாரணைகளில் தெரியவந்துள்ளது.

குறித்த குழுவினர் கடந்த ஏப்ரல் 22ஆம் திகதி ஒரு அனுசரணையாளரின் நிதி உதவியுடன் தாய்லாந்தின் பாங்கொக் நகருக்குச் சென்றுள்ளனர். இவர்கள் வெளிநாட்டில் தங்கியிருந்தபோது சாதாரண உடையில் இருந்த புகைப்படங்கள் மற்றும் காணொளிகள் அவர்களது கைபேசிகளிலிருந்து கண்டறியப்பட்டுள்ளன.

சந்தேக நபர்கள்: இவர்கள் நாட்டின் பல்வேறு பகுதிகளைச் சேர்ந்தவர்கள் என்றும், உயர்கல்வி பயிலும் இளம் பிக்குகள் என்றும் அடையாளம் காணப்பட்டுள்ளனர். பண்டாரநாயக்க சர்வதேச விமான நிலைய வரலாற்றில், ஒரே நேரத்தில் இவ்வளவு பெரிய அளவிலான போதைப்பொருள் கைப்பற்றப்பட்டதும், துறவிகள் குழுவொன்று இவ்வாறான கடத்தலில் ஈடுபட்டு கைது செய்யப்பட்டதும் இதுவே முதல் முறையாகும்.

கைது செய்யப்பட்ட சந்தேக நபர்கள் மேலதிக சட்ட நடவடிக்கைகளுக்காக நீர்கொழும்பு நீதவான் நீதிமன்றத்தில் ஆஜர்படுத்தப்படவுள்ளனர். பொலிஸ் போதைப்பொருள் தடுப்புப் பிரிவினர் இது தொடர்பான மேலதிக விசாரணைகளை முன்னெடுத்து வருகின்றனர்.