சட்டவிரோத மீன்பிடி: நால்வர் கைது

யாழ்ப்பாணம், கட்டைக்காடு கடற்கரைப் பகுதியில் ஒளிக்கற்றைகளைப் (Light Course) பயன்படுத்திச் சட்டவிரோத மீன்பிடியில் ஈடுபட்ட நான்கு பேரை வெற்றிலைக்கேணி கடற்படைப் புலனாய்வுப் பிரிவினர் கைது செய்துள்ளனர்.

கடந்த 20ஆம் திகதி இரவு 10:40 மணியளவில், கடற்படைப் புலனாய்வுப் பிரிவுக்குக் கிடைத்த இரகசியத் தகவலின் அடிப்படையில் மேற்கொள்ளப்பட்ட விசேட தேடுதல் நடவடிக்கையின் போதே இவர்கள் கைது செய்யப்பட்டனர். நான்கு சிறு படகுகளில் சட்டவிரோத மின்விளக்குகள் மற்றும் மின்கலங்களைப் பயன்படுத்தி மீன்பிடியில் ஈடுபட்டிருந்த நிலையிலேயே இவர்கள் பிடிபட்டனர்.

கைது செய்யப்பட்ட சந்தேக நபர்களில் மூவர் கட்டைக்காடு முள்ளியான் பகுதியைச் சேர்ந்தவர்கள் என்றும், மற்றைய நபர் ஆழியவளையைச் சேர்ந்தவர் என்றும் அடையாளம் காணப்பட்டுள்ளனர்.

கைப்பற்றப்பட்ட பொருட்கள்:
கைது செய்யப்பட்ட சந்தேக நபர்களிடமிருந்து பின்வரும் பொருட்கள் பறிமுதல் செய்யப்பட்டுள்ளன:

04 சிறு படகுகள் (Dinghies/FGD)

வெளி இணைப்பு இயந்திரங்கள் (OBM - Yamaha 40HP மற்றும் Suzuki 25HP)

சுமார் 43 லீற்றர் மண்ணெண்ணெய்

மின்கலங்கள் (Batteries)

நீரில் மூழ்கிப் பயன்படுத்தக்கூடிய 11 மின்விளக்குகள்

நங்கூரங்கள் மற்றும் 03 கைபேசிகள்

கைது செய்யப்பட்டவர்களும் பறிமுதல் செய்யப்பட்ட பொருட்களும் ஏப்ரல் 21 அதிகாலை வெற்றிலைக்கேணி கடற்படை முகாமிற்குக் கொண்டு வரப்பட்டனர். அதனைத் தொடர்ந்து, இன்று காலை 10:30 மணியளவில் மேலதிக சட்ட நடவடிக்கைகளுக்காக யாழ்ப்பாண மீன்பிடித் திணைக்கள அதிகாரிகளிடம் ஒப்படைக்கப்பட்டனர்.

கடல் வளத்தை அழிக்கும் இவ்வாறான சட்டவிரோத மீன்பிடி நடவடிக்கைகளுக்கு எதிராகத் தொடர்ந்து கடுமையான கண்காணிப்பு நடவடிக்கைகள் மேற்கொள்ளப்படும் என அதிகாரிகள் எச்சரித்துள்ளனர்.

பூ.லின்ரன்