சுனாமியால் பாதிக்கப்பட்ட மக்களுக்கான வீட்டுத்தொகுதியில் 22 குடும்பங்கள் குடியேற்றம்

(அப்துல் அஸீஸ்)

கல்முனை கரைவாகு வட்டைப்பகுதியில் சுனாமியினால் பாதிக்கப்பட்டோர்களுக்காக கட்டப்பட்ட  மாடிவீட்டுத்தொகுதியில் இதுவரையில் கையளிக்கப்படாத 22 வீடுகளில் சுனாமி அனர்த்தத்தினால் பாதிக்கப்பட்ட மக்கள் நேற்று வியாழக்கிழமை குடியேறினர்.

கல்முனையில் சுனாமி அனர்த்தத்தினால் பாதிக்கப்பட்டோர்களுக்காக 456 வீடுகள் கட்டப்பட்டன. இதில்; 427 வீடுகள் சுனாமியால் பாதிக்கப்பட்ட மக்களுக்கு விநியோகிக்கப்பட்டன. எஞ்சிய  29 வீடுகளையும் பெற்றுக்கொள்வதற்காக சுனாமியால் பாதிக்கப்பட்ட நூற்றுக்கணக்கான குடும்பங்கள் விண்ணப்பித்திருந்தன.

இந்த நிலையில், இந்த விண்ணப்பங்கள் அம்பாறை மாவட்ட செயலகத்தினால் பரிசீலிக்கப்பட்டு முதற்கட்டமாக 7 வீடுகள் நேற்று வியாழக்கிழமை விநியோகிக்கப்பட்டன.  இந்த வீடுகளுக்காக விண்ணப்பித்திருந்த ஏனைய குடும்பங்கள் எந்தவித அனுமதியுமின்றி தாமாமகவே 22 வீடுகளிலும் குடியேறினர்.

குடியேறிய மக்கள் கருத்து தெரிவிக்கையில், 'எங்களிடமிருந்து விண்ணப்பங்களைப் பெற்ற அதிகாரிகள் இதுவரை காலமும் இழுத்தடிப்பு செய்து வந்த நிலையில், 7 வீடுகளை மாத்திரமே நேற்றையதினம் விநியோகித்தனர். இந்த நிலையில் ஏனையோர்களுக்கு வீடுகளை விநியோகிக்காமையானது அதிகாரிகள் எங்களை ஏமாற்றுவதாவே உள்ளது' என்றனர்.