கழுத்தில் வயர் இறுகியதில் 6 வயது சிறுமி பலி;பாலமுனையில் சம்பவம்

(ஹனீக் அஹமட்)

விளையாடிக் கொண்டிருந்த சிறுமியின் கழுத்தில் வயர் இறுகியதால் அதே இடத்தில் குறித்த சிறுமி மரணமான சம்பவமொன்று இன்று காலை அம்பாறை மாவட்டத்தின் பாலமுனைப் பிரதேசத்தில் இடம்பெற்றது.

பாலமுனை 3ஆம் பிரிவிலுள்ள நூஹா எனும் ஆறு வயதுடைய சிறுமி இன்று காலை தனது வீட்டில் வயர் துண்டொன்றை மரத்தில் கட்டி விளையாடிக் கொண்டிருந்த போது, வயரினுள் கழுத்து இறுகியதால் இந்த மரணம் ஏற்பட்டதாகக் கூறப்படுகிறது.

சிறுமியின் தாய் மத்திய கிழக்கு நாடொன்றில் பணிப் பெண்ணாக வேலை செய்து வருவதாகவும், பாட்டியின் பராமரிப்பில் சிறுமி இருந்ததாகவும் தெரியவருகிறது.

சிறுமியின் சடலம் பிரேத பரிசோதனைகளுக்காக தற்போது பாலமுனை, மாவட்ட வைத்தியசாலையில் வைக்கப்பட்டுள்ளது. மேலதிக விசாரணைகளை அக்கரைப்பற்று பொலிஸார் மேற்கொண்டு வருகின்றனர்.