கணவனுடனான சண்டையில் குழந்தையை கிணற்றில் வீசிய பெண் கைது

(எஸ்.மாறன்)

கணவனுடனான சண்டையில் தனது 11 மாதக் குழந்தையை கிணற்றில் வீசிய பெண்ணொருவர் பொலிஸாரால் கைது செய்யப்பட்டுள்ளதுடன் குழந்தை சிறு காயங்களுடன் மீட்கப்பட்ட சம்பவமொன்று அட்டாளைச்சேனை, பாலமுனை பிரதேசத்தில் நேற்று வியாழக்கிழமை இடம்பெற்றுள்ளது.

பாலமுனை, உதுமாபுர பிரதேசத்தை சேர்ந்த இளம் தம்பதியினருக்குள் சம்பவதினம் காலை 11 மணியளவில் ஏற்பட்ட சண்டையின் போதே அப்பெண் பிறந்து 11 மாதங்களேயான தனது பெண் குழந்தையை திடீர் எனத் தூக்கி வீட்டின் கிணற்றினுள்
போட்டுள்ளார்.

இதனைக் கண்ட குழந்தையின் தந்தை, கிணற்றில் குதித்து குழந்தையைக் காப்பாற்றி சிகிச்சைக்காக அக்கரைப்பற்று ஆதார வைத்தியசாலையில் அனுமதித்துள்ளார் என்று அக்கரைப்பற்று பொலிஸார் தெரிவித்தனர்.

இச்சம்பவத்துடன் தொடர்புடையதாகக் கைது செய்யப்பட்ட பெண்ணை நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதுடன் இது தொடர்பான மேலதிக விசாரணைகளை அக்கரைப்பற்று பொலிஸார் மேற்கொண்டு வருகின்றனர்.