வாகன விபத்தில் ஒருவர் காயம்

-பைஷல் இஸ்மாயில்

சம்மாந்துறை பொலிஸ் பிரிவுக்குட்பட்ட காரைதீவு பிரதான வீதியில் செவ்வாய்க்கிழமை (21) இடம்பெற்ற வாகன விபத்தில் ஒருவர் காயமடைந்துள்ளதாக சம்மாந்துறை பொலிஸார் தெரிவித்தனர்.

இலங்கை மின்சார சபையினர் காரைதீவு விசேட அதிரடிப்படை முகாமுக்கு முன்னால் மின்சார திருத்த வேலையில் ஈடுபட்டிருந்தபோதே இந்த விபத்து இடம்பெற்றுள்ளதாக சம்மாந்துறை பொலிஸார் தெரிவித்தனர்.

கல்முனையிலிருந்து அக்கரைப்பற்று நோக்கி வந்த மோட்டார் சைக்கிள் சாரதியின் கவனயீனம் காரணமாக காரைதீவு விசேட அதிரடிப்படை முகாமுக்கு முன்னால் நிறுத்தி வைக்கப்பட்டிருந்த இலங்கை மின்சார சபைக்குச் சொந்தமான வாகனத்தின் மீது மோதியதில் மோட்டார் சைக்கிள் சாரதி காயங்களுக்குள்ளாகியதாக பொலிஸார் தெரிவித்தனர்.

விபத்தினால் மோட்டார் சைக்கிள் பாரிய சேதங்களுக்குள்ளாகியுள்ளது.

இந்த விபத்து தொடர்பான மேலதிக விசாரணைகளை சம்மாந்துறை பொலிஸார் மேற்கொண்டு வருகின்றனர்.