அனுமதிப்பத்திரமின்றி கால்நடைகளை கொண்டு சென்ற இருவர் கைது

கனகராசா சரவணன்

அம்பாறை வீதி 5ஆம் கட்டைப் பகுதியில் இருந்து அக்கரைப்பற்று நகருக்கு அனுமதிப்பத்திரமின்றி 5 கால் நடைகளை கொண்டு சென்ற இருவரை, நேற்று (16) பொலிஸார் கைதுசெய்துள்ளனர்.

மேலும், கால்நடைகளை கொண்டு செல்ல பயன்படுத்தப்பட்ட சிறிய ரக வாகனமொன்றையும் 5 கால்நடைகளையும் பொலிஸார் கைப்பற்றியுள்ளனர்.

அம்பாறை வீதியில் நேற்று இரவு வீதி ரோந்து நடவடிக்கையில் ஈடுபட்டுக் கொண்டிருந்த பொலிஸார், அக்கரைப்பற்று நகரை நோக்கி பயணித்துக்கொண்டிருந்த குறித்த வாகனத்தை சோதனையிட்ட போதே அனுமதிப்பத்திரமின்றி சட்டவிரோதமான முறையில் கால்நடைகளை கொண்டுச் சென்றமை தெரியவந்துள்ளது.

இதில் 3 பசு மாடுகளும் இரண்டு எருமை மாடுகளும் கொண்டுச்செல்லப்பட்டுள்ளன.

கைது செய்யப்பட்டவர்களை நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாக பொலிஸார் தெரிவித்தனர்.