சாய்ந்தமருதுப் பிரதேசப் பாடசாலைகளின் அபிவிருத்திக்கு 16 கோடி ரூபாய் நிதி ஒதுக்கீடு

-ஏ.எல்.எம்.ஷினாஸ்

சாய்ந்தமருதுப் பிரதேசப் பாடசாலைகளின் அபிவிருத்திக்கு 16 கோடி ரூபாய் நிதி ஒதுக்கீடு செய்யப்பட்டுள்ளது என விளையாட்டுத்துறை பிரதி அமைச்சரும் ஸ்ரீ லங்கா முஸ்லிம் காங்கிரஸின் பிரதித் தலைவருமான எச்.எம்.எம்.ஹரீஸ் தெரிவித்தார்.

இத்திட்டத்தின் கீழ் பாடசாலை ஒன்றின் அபிவிருத்திக்கு 2 கோடி ரூபாய் படி நிதி வழங்கப்படவுள்ளதாகவும் அவர் கூறினார்.
 
'அருகிலுள்ள பாடசாலை சிறந்த பாடசாலை' எனும்  வேலைத்திட்டத்தின் கீழ் இந்த நிதி ஒதுக்கீடு செய்யப்பட்டுள்ளது.

இத்திட்டத்தின் கீழ் அபிவிருத்தி செய்யப்படவுள்ள சாய்ந்தமருது அல்-ஜலால் வித்தியாலயத்தின் அபிவிருத்தி வேலைகள் அங்குரார்ப்பணம் செய்துவைக்கும் நிகழ்வு இன்று (12) வெள்ளிக்கிழமை  இடம்பெற்றது.

அல்-ஜலால் வித்தியாலயத்தின் அதிபர் எம்.எஸ்.நபார் தலைமையில் இடம்பெற்ற இந்நிகழ்வில் விளையாட்டுத்துறை பிரதி அமைச்சரும் ஸ்ரீ லங்கா முஸ்லிம் காங்கிரஸின் பிரதித் தலைவருமான எச்.எம்.எம்.ஹரீஸ் பிரதம அதிதியாகக் கலந்துகொண்டு அபிவிருத்தி வேலைகளை ஆரம்பித்து வைத்தார்.