வயோதிபப் பெண் வடிகானுக்குள் விழுந்து மரணம்

ஏறாவூர் பொலிஸ் பிரிவிலுள்ள செங்கலடியில் விறகுக் கட்டை தலையில் வைத்துச் சுமந்து சென்ற வயோதிபப் பெண்ணொருவர், வடிகானுக்குள் விழுந்து மரணித்து விட்டதாக பொலிஸார் தெரிவித்தனர்.

செங்கலடி ரமேஸ்புரம் முருகன் கோவில் வீதியைச் சேர்ந்த தாமோதரம் யோகநாயகி (வயது 65) என்பவரே இவ்வாறு திங்கட்கிழமை இரவு மரணத்தைத் தழுவியுள்ளார்.

சடலம் பிரேத பரிசோதனைக்காக செங்கலடிப் பிரதேச வைத்தியசாலைக்கு எடுத்து வரப்பட்டுள்ளது.

இந்த வயோதிபப் பெண் பதுளை வீதியிலுள்ள பங்குடாவெளிக்குச் சென்று விறகு சேகரித்து விட்டு வீடு திரும்பும்போது வடிகானுக்குள் விழுந்து மரணித்துக் கிடந்ததாக விசாரணையிலிருந்து தெரியவந்துள்ளதாக பொலிஸார் தெரிவித்தனர்.

சம்பவம் பற்றிய மேலதிக விசாரணைகளில் பொலிஸார் ஈடுபட்டுள்ளனர்.