‘பிராம்ப்டர்’ கருவி வைத்து மு.க.ஸ்டாலின் பிரசாரம்

பிரதமர் மோடி ஹிந்தியில் தனக்கே உரித்தான பாணியில் சரளமாகப் பிரசாரம் செய்யக் கூடியவர். ஹிந்தி அளவு ஆங்கிலத்திலும் தடையின்றி பேசுவதற்காக மோடி பிரதமரானது முதல் ‘பிராம்ப்டர்’ கருவியைப் பயன்படுத்தி வருகிறார். ஆரம்பத்தில் அவர் ‘பிராம்ப்டர்’ கருவியைப் பயன்படுத்துவது யாருக்கும் தெரியாமல் இருந்தபோது, மோடியின் பிரமாதமான ஆங்கில உரையைக் கேட்டு, அனைவரும் ஆச்சரியம் அடைந்தனர்.

அதன்பிறகுதான், மோடி பிராம்ப்டர் கருவியை பயன்படுத்துவது தெரியவந்தது. அமெரிக்க முன்னாள் ஜனாதிபதி  ஒபாமா, அவரது பிரசாரத்துக்கு ‘பிராம்ப்டர்’ கருவியைப் பயன்படுத்தினார். அவரைப் பார்த்து பிரதமர் மோடியும் பயன்படுத்தியதாகக் கூறுகின்றனர்.

தற்போது மோடியைப் போல், திமுக தலைவர் மு.க. ஸ்டாலினும் தனது ‘உங்கள் தொகுதியில் ஸ்டாலின்’ பிரசார மேடைகளில் ‘பிராம்ப்டர்’ கருவி மூலம் பேசி வருகிறார். சமீப காலமாக ஸ்டாலின் பொது நிகழ்ச்சிகள் மட்டுமில்லாது, கட்சி நிகழ்ச்சிகளில் பேசும்போதும் சில தகவல்களை தவறுதலாகப் பேசி, அது சமூக வலைத்தளங்களில் பரவி விவாதப் பொருளானது.

அதனால், அதுபோன்ற தவறுகளும், தர்மசங்கடமான நிகழ்வும் தேர்தல் பிரசாரத்தில் நடக்காமல் இருக்கவும், ஒவ்வொரு மாவட்டப் பிரச்சினைகளையும் பொதுமக்களுக்கு எளிமையாகப் புரியும்படி துல்லியமாக, அழகாகப் பேசவும், அவரது பிரசார சுற்றுப் பயணத்தை வடிவமைக்கும் ‘ஐ-பேக்’நிறுவனம் கொடுத்த ஐடியா அடிப்படையில் ஸ்டாலின் ‘பிராம்ப்டர்’ மூலம் தற்போது பிரச்சாரம் செய்துவருவதாக கட்சியினர் கூறுகின்றனர்.