புதுச்சேரி சபாநாயகர் இராஜினாமா

புதுச்சேரி

புதுச்சேரி சபாநாயகர் சிவக்கொழுந்து தனது பதவியை இராஜினாமா செய்து ஆளுநர் தமிழிசைக்கும், சட்டப்பேரவைச் செயலர் முனுசாமிக்கும் கடிதம் அனுப்பியுள்ளார். ஆனால், அவர் தனது எம்எல்ஏ பதவியை இராஜினாமா செய்யவில்லை.

புதுவை காங்கிரஸ் அமைச்சரவையில் இருந்து நமச்சிவாயம், மல்லாடி கிருஷ்ணாராவ், எம்எல்ஏல்கள் லட்சுமி நாராயணன், தீப்பாய்ந்தான், ஜான்குமார், திமுக எம்எல்ஏ வெங்கடேசன் ஆகியோர் ராஜினாமா செய்தனர். இவர்களில் மல்லாடி கிருஷ்ணாராவ், லட்சுமி நாராயணனைத் தவிர்த்து மற்றவர்கள் பாஜகவில் இணைந்துள்ளனர்.

இந்நிலையில் காரைக்காலில் நடந்த பொதுக் கூட்டத்தில் மத்திய உள்துறை அமைச்சர் அமித் ஷா முன்னிலையில் முன்னாள் எம்எல்ஏக்கள் ஜான்குமார், வெங்கடேசன், அருள்முருகன் உள்ளிட்டோர் நேற்று இணைந்தனர். இவர்களுடன் சபாநாயகரின் சொந்தத் தம்பியான வி.பி.ராமலிங்கம் அவரது மகன் வி.சி.ரமேஷ் ஆகியோரும் பாஜகவில் இணைந்தனர்.

இதனால் சபாநாயகரும் பாஜகவில் இணைவார் என்ற தகவல் பரவியது. இந்நிலையில் சபாநாயகர் சிவக்கொழுந்து தனது பதவியை இராஜினாமா செய்து ஆளுநர் தமிழிசைக்கும், சட்டப்பேரவைச் செயலர் முனுசாமிக்கும் கடிதம் அனுப்பியுள்ளார்.