ரெயில்வே முன்னாள் அமைச்சர் பா.ஜ.க.வில் இணைவு

புதுடெல்லி,

மன்மோகன் சிங்  அமைச்சரவையில் ரெயில்வே அமைச்சராகப் பதவி வகித்த தினேஷ் திரிவேதி, பா.ஜ.க.வில் சேர்ந்தார்.

திரிணாமுல் காங்கிரஸ் கட்சியின் மூத்த தலைவர்களில் ஒருவராக விளங்கியவர் தினேஷ் திரிவேதி. இவர் 2011-12 காலகட்டத்தில் மத்தியில் மன்மோகன் சிங்  அமைச்சரவையில் ரெயில்வே அமைச்சராகப் பதவி வகித்தார். பாராளுமன்ற மாநிலங்களவை எம்.பி.யாக இருந்து வந்த இவர், கடந்த மாதம் அந்த பதவியில் இருந்து விலகினார்.

இந்த நிலையில் அவர் டெல்லியில் பா.ஜ.க. தேசிய தலைவர் ஜே.பி.நட்டா, மத்திய அமைச்சர்கள் பியூஷ் கோயல், தர்மேந்திர பிரதான் ஆகியோர் முன்னிலையில் நேற்று பா.ஜ.க.வில் சேர்ந்தார்.

அதைத் தொடர்ந்து அவர் பா.ஜ.க.வுக்கு புகழாரம் சூட்டி கருத்து தெரிவித்தார். அப்போது அவர், “இந்த பொன்னான தருணத்துக்காக காத்திருந்தேன். சில கட்சிகளில் குடும்பம்தான் பெரிது, ஆனால் பா.ஜ.க.வில் மனிதர்கள்தான் பெரிது” என குறிப்பிட்டார்.