கனிமொழி வெற்றிக்கு எதிரான வழக்கை திரும்பப் பெறுவதாக ஆளுநர் தமிழிசை தகவல்

இந்திய நாடாளுமன்றத்தின் கீழவை உறுப்பினர் கனிமொழியின் வெற்றிக்கு எதிரான வழக்கை திரும்பப் பெறுவதாக தெலுங்கானா ஆளுநர் தமிழிசை செளந்தரராஜன் சென்னை உயர் நீதிமன்றத்தில் தெரிவித்துள்ளார்

தூத்துக்குடி நாடாளுமன்ற தொகுதியில் கனிமொழியை எதிர்த்து பாரதிய ஜனதாக் கட்சி சார்பில் தமிழிசை செளந்தரராஜன் போட்டியிட்டார். அத்தேர்தலில் திராவிட முன்னேற்றக் கழகம் (தி.மு.க) சார்பில் போட்டியிட்ட கனிமொழி வெற்றிபெற்றார். கனிமொழி வெற்றி பெற்றதை எதிர்த்து சென்னை உயர் நீதிமன்றத்தில் தற்போது தெலுங்கானா ஆளுநராக உள்ள தமிழிசை செளந்தரராஜன் மனு தாக்கல் செய்து இருந்தார்.

கனிமொழியின் வேட்பு மனுவில் குளறுபடிகள் இருந்ததாகவும் அதனை சுட்டிக்காட்டிய பின்னரும் கூட தேர்தல் அதிகாரிகள் பரிசீலனை செய்யவில்லை என்று தனது மனுவில் தமிழிசை செளந்தரராஜன் தெரிவித்து இருந்தார்.

இந்த மனு மீதான விசாரணை நிலுவையில் உள்ள நிலையில், வழக்கை திரும்பப் பெறுவதாக தமிழிசை செளந்தரராஜன் சென்னை உயர் நீதிமன்றத்தில் தெரிவித்துள்ளார். ஆளுநராக நியமிக்கப்பட்டுள்ளதால், வழக்கை தொடர்ந்து நடத்த விரும்பவில்லை என்று தமிழிசை செளந்தரராஜன் தரப்பில் தெரிவிக்கப்பட்டுள்ளது.

மனு குறித்து கருத்து தெரிவிக்க ஏதுவாக, உரிய அழைப்பாணையை அரசிதழில் வெளியிட உத்தரவிட்ட சென்னை உயர் நீதிமன்றம் மனு மீதான விசாரணையை அடுத்த மாதம் 14ஆம் திகதிக்கு தள்ளிவைத்தது.