கொக்குவில் சி.சி.சி மற்றும் சென்றலைட்ஸ் அரையிறுதியில்

Super User / 2014 ஜூன் 22 , பி.ப. 01:25 - 0 - {{hitsCtrl.values.hits}}

-குணசேகரன் சுரேன்

யாழ்ப்பாணம் பிறிமியர் லீக் டுவென்டி – 20 துடுப்பாட்டப் போட்டியின் அரையிறுதிக்கு கொக்குவில் மத்திய சனசமூக நிலைய அணியும் சென்றலைட்ஸ் அணியும் உள்நுழைந்தன.

யுவ பவுண்டேஸன் நிறுவனத்தின் ஏற்பாட்டில் யாழ். மாவட்ட துடுப்பாட்ட அணிகளுக்கிடையில் யாழ்ப்பாணம் பிறிமியர் லீக் என்னும் டுவென்டி – 20 துடுப்பாட்டப் போட்டிகள் யாழ்ப்பாணம் இந்துக் கல்லூரி மைதானத்தில் இடம்பெற்று வருகின்றது.

இந்தச் சுற்றுப்போட்டியில் மொத்தமாக 18 அணிகள் பங்குபற்றுவதுடன், முதற்சுற்றுப்போட்டிகள் லீக் முறையில் நடைபெற்று காலிறுதிப் போட்டிகள் இடம்பெற்றன.

ஏற்கனவே இடம்பெற்ற இரண்டு காலிறுதிப் போட்டிகளின் மூலம் பற்றீசியன் மற்றும் யூனியன் அணிகள் அரையிறுதிக்குள் நுழைந்தன.
இந்நிலையில் 3 ஆவது மற்றும் 4 ஆவது காலிறுதி ஆட்டங்கள் நேற்று சனிக்கிழமை (21) இடம்பெற்றன.

செல்ரனின் அதிரடித் துடுப்பாட்டத்தின் மூலம் இலகு வெற்றி பெற்ற சென்றலைட்ஸ்

3 ஆவது காலிறுதியாட்டத்தில் ஸ்கந்தா ஸ்டார்ஸ் அணியினை எதிர்த்து சென்றலைட்ஸ் அணி மோதியது.

நாணயச் சுழற்சியில் வென்ற ஸ்கந்தா ஸ்டார்ஸ் அணி முதலில் களத்தடுப்பில் ஈடுபடத் தீர்மானித்தது.

அதற்கிணங்கக் களமிறங்கிய சென்றலைட்ஸ் அணி எஸ்.செல்ரனின் அதிரடித் துடுப்பாட்டப் போட்டத்தின் மூலம் 20 பந்துபரிமாற்றங்களில் 9 இலக்குகளை இழந்து 194 ஓட்டங்களைப் பெற்றது.

துடுப்பாட்டத்தில் எஸ்.செல்ரன் 25 பந்துகளில் 63 ஓட்டங்களையும் எம்.வதூஸனன் 52 ஓட்டங்களையும் எஸ்.எட்வேர்ட்எடின் 24 ஓட்டங்களையும் பெற்றுக்கொடுத்தனர்.
பந்துவீச்சில் ஸ்கந்தா ஸ்டார்ஸ் அணி சார்பாக கே.ஜனக்ஸன் 2 இலக்குகளைக் கைப்பற்றினார்.

195 ஓட்டங்கள் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய ஸ்கந்தா ஸ்டார்ஸ் அணி 20 பந்துபரிமாற்றங்களில் 8 இலக்குகளை இழந்து 109 ஓட்டங்களை மாத்திரம் பெற்றது. துடுப்பாட்டத்தில் என்.நிசாகரன் 32 ஓட்டங்களைப் பெற்றுக்கொடுத்தார்.

பந்துவீச்சில் சென்றலைட்ஸ் அணி சார்பாக என்.சாள்ஸ், எஸ்.சௌமிதரன் தலா 2 இலக்குகளைக் கைப்பற்றினார்கள்.
இந்தப் போட்டியின் ஆட்டநாயகனாக எஸ்.செல்ரன் தெரிவு செய்யப்பட்டார்.

தொடர்ந்து இரண்டாவது முறையாக அரையிறுதிக்குள் நுழைந்த கே.சி.சி.சி

4 ஆவது காலிறுதிப் போட்டியில் கொக்குவில் மத்திய சனசமூக நிலைய அணியினை எதிர்த்து ஜொனியன்ஸ் அணி மோதியது.

நாணயச் சுழற்சியில் வென்ற ஜொனியன்ஸ் அணி முதலில் துடுப்பெடுத்தாடக் களமிறங்கி 20 பந்துபரிமாற்றங்களில் 9 இலக்குகளை இழந்து 135 ஓட்டங்களைப் பெற்றது. துடுப்பாட்டத்தில் எஸ்.சஞ்சயன் 20, எல்.அகிலன் 18 ஓட்டங்களைப் பெற்றுக்கொடுத்தார்.
பந்துவீச்சில் எம்.பவிதரன், எஸ்.சாம்பவன் தலா 2 இலக்குகளைக் கைப்பற்றினார்கள்.

தொடர்ந்து 136 ஓட்டங்களைப் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய கொக்குவில் மத்திய சனசமூக நிலைய அணி, ஆர்.இராகுலனின் அதிரடியான துடுப்பாட்டத்தின் மூலம் 18.1 பந்துபரிமாற்றங்களில் 5 இலக்குகளை மாத்திரம் இழந்து வெற்றியிலக்கை அடைந்தது. துடுப்பாட்டத்தில் ஆர்.இராகுலன் 28 பந்துகளில் 48 ஓட்டங்களையும், எஸ்.பங்குஜன் 20, ஏ.ஜெயரூபன் 19 ஓட்டங்களையும் பெற்றுக்கொடுத்தனர்.

பந்துவீச்சில் ஜொனியன்ஸ் அணி சார்பாக எல்.லவேந்திரா 2 இலக்குகளைக் கைப்பற்றினார்.

இந்தப் போட்டியின் ஆட்டநாயகனாக ஆர்.இராகுலன் தெரிவு செய்யப்பட்டார்.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .