நல உதயம் அமைப்பின் மீளுருவாக்கம்

கலை, கலாசாரம் மற்றும் சமூக சேவைகளில் கடந்த 46 ஆண்டுகளாகத் தொடர்ச்சியாகப் பணியாற்றி வரும் “புதிய அலை கலை வட்டம்”, அதன் ஓர் அங்கமான “நல உதயம் அமைப்பை” மீளுருவாக்கம் செய்துள்ளது. இதன் முதற்கட்டமாக, அர்த்தமுள்ள மற்றும் சமூகப் பயனுடைய விசேட நிகழ்வொன்று  26.04.2026 அன்றுவத்தளை நகர மண்டபத்தில் சிறப்பாக நடைபெற்றது.

சித்திரை புத்தாண்டை முன்னிட்டு ஏற்பாடு செய்யப்பட்ட இவ்விழா, கிராமிய மரபுகளை மீண்டும் உயிர்ப்பிக்கும் நோக்கத்துடன் நடத்தப்பட்டது. பாரம்பரியத்தைப் பிரதிபலிக்கும் பல்வேறு கிராமிய விளையாட்டுப் போட்டிகள், இம்முறை விசேட தேவையுடையோருக்காக மாத்திரம் பிரத்தியேகமாக நடத்தப்பட்டமை சிறப்பம்சமாகும். இப்போட்டிகள் மக்களிடையே ஒற்றுமை, ஒத்துழைப்பு மற்றும் ஆரோக்கியமான போட்டித் தன்மையை வளர்க்கும் வகையில் அமைந்திருந்தன.

பாராட்டுக்களும் கௌரவிப்புகளும்:
நிகழ்வின் முக்கிய அம்சமாக, போட்டிகளில் பங்கேற்றுத் திறமையை வெளிப்படுத்தியவர்களுக்கும் வெற்றி பெற்றவர்களுக்கும் பாராட்டுச் சான்றிதழ்கள், நினைவுப் பரிசுகள் மற்றும் ஊக்குவிப்புப் பரிசுகள் வழங்கப்பட்டன. அதேவேளை, சமூக சேவையில் நீண்டகாலமாக அர்ப்பணிப்புடன் செயற்பட்டு வருபவர்களைக் கௌரவிக்கும் விருது வழங்கும் நிகழ்வும் இதன்போது இடம்பெற்றது.

சிறப்பு விருந்தினர்கள்:
இவ்விழாவின் பிரதம அதிதிகளாக ஹாசிம் உமர் பவுண்டேஷன் நிறுவனர், புரவலர் ஹாஷிம் உமர் மற்றும் மர்யம் ஹாஷிம் உமர் ஆகியோர் கலந்து கொண்டனர். மேலும், தினகரன் பத்திரிகையின் பிரதம ஆசிரியர் செந்தில் வேலவர், நகர சபை உறுப்பினர் விஜயகுமார், பிரபல பேச்சாளரும் இலக்கியவாதியுமான பி. எஸ். செல்வரட்ணம், தொழிலதிபரும் வாழ்வியல் மேம்பாட்டுப் பேச்சாளருமான டாக்டர் விஜயசிறி சந்திரமோகன் மற்றும் புதிய அலை கலை வட்டத்தின் நிறுவனர் ராதா மேத்தா உள்ளிட்ட பல முக்கிய பிரமுகர்கள் கலந்துகொண்டு நிகழ்வைச் சிறப்பித்தனர்.

நிதி உதவி:
கலை நிகழ்ச்சிகள் மற்றும் கலாசார நிகழ்வுகளுடன் களைகட்டிய இவ்விழாவில், விசேட தேவையுடைய குடும்பஸ்தர் ஒருவருக்கு இரு கால்களையும் பொருத்துவதற்கான நிதி உதவிகள் பலரால் முன்வந்து வழங்கப்பட்டன. இது நிகழ்வின் மிக முக்கியமான மற்றும் நெகிழ்ச்சியான அங்கமாக அமைந்தது.