இந்தியாவை விட இலங்கையில் தான் கலை ஆர்வம் அதிகம்

வி.ரி சகாதேவராஜா

இந்தியாவில் கலை பிறந்து இருக்கலாம். ஆனால், இலங்கையில் தான் கலை ஆர்வம் மிகவும் கூடுதலாக இருக்கிறது என அவுஸ்திரேலியாவிலிருந்து வருகை தந்த நடன கலைஞர் சிதம்பரம் ஆர் சுரேஷ் தெரிவித்தார்.  அவருடன் மனைவி நடன நர்த்தகி ஷோபனா சுரேஷூம் செவ்வாய்க்கிழமை (24) மாலை காரைதீவுக்கு வருகை தந்திருந்தனர் .

காரைதீவு விபுலானந்தா மணிமண்டபத்தில் அவர்களுக்கு வரவேற்பு அளிக்கப்பட்டது. சுவாமி விபுலானந்தர் பிறந்த இல்லத்தையும் அரும்பொருள் காட்சியகத்தையும் அவர்கள் பார்வையிட்டனர்.

 நடன கலைஞர் சிதம்பரம் ஆர் சுரேஷ் அங்கு மேலும் பேசுகையில்கூறியதாவது:  தமிழ்நாட்டில் உள்ள மாணவர்களை விட இலங்கையில் உள்ள மாணவர்கள் கலையில் ரொம்ப ஆர்வமாக இருக்கிறார்கள். எனக்கு யாழ்ப்பாணம் மட்டக்களப்பு பல்கலைக்கழகங்களில் நிறைய நண்பர்கள் இருக்கின்றார்கள். அவர்கள் வெளிநாடுகளில் பல கலைப் பள்ளிகளை நடத்தி வருகின்றார்கள். நான் சிதம்பரம் அண்ணாமலை பல்கலைக்கழகத்தில் பயின்றவன். சிதம்பரம் நடராஜர் ஆலயம்  சிறப்பானது  என்றார். 

நடன கலைஞர் சுரேஷ், அவுஸ்ரேலியா நாட்டில் ‘சமர்பணா’ நாட்டிய பள்ளியை நடத்தி வருகிறார். இவரது மனைவி  நாட்டிய கலைஞர் திருமதி சோபனா சுரேஸ் சிலம்பு கலையிலும் சிறந்தவர். நடனத்துக்கு முக்கியமானது தாளம் என்பதை விளக்கி ‘108 பரதநாட்டிய ஜதிகள்’ எனும் நூலை தமிழ் , ஆங்கிலம் ஆகிய மொழிகளில் வெளியிட்டுள்ளார் என்பது குறிப்பிடத்தக்கதாகும்.