60க்கு மேற்பட்டோருக்கு ஆபத்து அதிகம்

இலங்கையில் இதுவரை கொரோனா தொற்றால் மரணமடைந்தவர்களில்  91 சதவீதமானோர் தடுப்பூசி பெற்றிருக்கவில்லை என்று தொற்றுநோயியல்  பிரிவின் பதில் தலைவர் வைத்திய நிபுணர் டொக்டர் சமித கினிகே தெரிவித்துள்ளார்.

அரசாங்க தகவல் திணைக்களத்தில் இன்று (22) நடைபெற்ற ஊடகவியலாளர் சந்திப்பிலேயே மேற்கண்ட விடயத்தை அவர் தெரிவித்தார்.
 
60 வயதுக்கு மேற்பட்ட  மிகவும் சிறு தொகையினருக்கு தடுப்பூசி போடப்படாதது பிரச்சனை என்பதால், நாட்டின் பல பகுதிகளில் தனியாக தடுப்பூசி மையங்களை அமைத்து 60 வயதுக்கு மேற்பட்டவர்களுக்கு தொடர்ந்து தடுப்பூசி போடுவோம் என்று தெரிவித்த அவர், 60 வயதுக்கு மேற்பட்ட அனைவரும் விரைவில் தடுப்பூசி போடுவது முக்கியம் என்றும் சுட்டிக்காட்டினார்.

உயிரிழப்புகளைக் குறைத்தல் மற்றும் நோய்கள் பரவுவதைக் குறைத்தல் ஆகிய இரண்டு முக்கிய நோக்கங்களை தடுப்பூசி கொண்டுள்ளது என்று தெரிவித்தார்.

கொரோனா மரணங்களில் 60 வயதுக்கு மேற்பட்டவர்களே 77 சதவீதம் உயிரிழக்கின்றனர் என்பதுன், 30 முதல் 59 வயதுக்குட்பட்டவர்களின் இறப்பு சதவீதம் 22  என்றும் குறிப்பிட்ட அவர்,   65 முதல் 70 சதவீதமான மரணங்கள் நாட்பட்ட நோயுள்ளவர்களுக்கே ஏற்பட்டுள்ளன என்றும் குறிப்பிட்டார்.

கொரோனா மரணத்துக்கு அதிக ஆபத்து உள்ளதால் 60 வயதுக்கு மேற்பட்ட அனைத்து மக்களுக்கும் தடுப்பூசி போட வேண்டும் என்று அவர் வலியுறுத்தினார்.