’டித்வா’வுக்கு எதிராக கண்டி வழக்கறிஞர் மனு

ஜனாதிபதி, அமைச்சரவை மற்றும் பல  அதிகாரிகள் 'டித்வா' சூறாவளியின் தாக்கத்தைக் குறைக்க சரியான நேரத்தில் மற்றும் ஒருங்கிணைந்த நடவடிக்கை எடுக்கத் தவறிவிட்டதாகக் குற்றம் சாட்டி மனுவைத் தாக்கல் செய்யப்பட்டுள்ளது. வரவிருக்கும் பேரழிவு குறித்து முன்கூட்டியே அறிவிக்கப்பட்டிருந்தும், நடவடிக்கை எடுக்கவில்லை என்றும் அந்த மனுவில் தெரிவிக்கப்பட்டள்ளது.

கண்டியில் வசிக்கும் வழக்கறிஞர் கீர்த்தி பண்டார கிரிதேன, உயர் நீதிமன்றத்தில் அடிப்படை உரிமைகள் மனு ஒன்றை தாக்கல் செய்து மேற்கண்டவாறு குற்றஞ்சாட்டியுள்ளார்.

பேரிடர் அபாயத்தைக் குறைப்பது தொடர்பாக அவர்களின் நடவடிக்கைகள் மற்றும் தவறுகளைக் காரணம் காட்டி, ஜனாதிபதி, அமைச்சரவை, பேரிடர் மேலாண்மைக்கான தேசிய பேரவை மற்றும் பிற தொடர்புடைய அதிகாரிகளுக்கு எதிராக வழக்கறிஞர் இந்த மனுவைத் தாக்கல் செய்துள்ளார்.

ஜனாதிபதி தனது உத்தியோகபூர்வ தகுதியில் செயல்படும் போது மனுதாரரின் அடிப்படை உரிமைகளை மீறியதாகக் கூறப்படும் வழக்கில், அரசியலமைப்பின் 35 வது பிரிவின்படி சட்டமா அதிபர் முதலாவது பிரதிவாதியாகப் பெயரிடப்பட்டுள்ளார்.

மனுதாரர் தனது மனுவில், ஜனாதிபதி அனுரகுமார திசாநாயக்க, தேசிய பேரிடர் மேலாண்மைக்கான பேரவையின் தலைவராகச் செயல்படுவதாகக் கூறுகிறார், அவரும் ஒரு பிரதிவாதியாகக் குறிப்பிடப்பட்டுள்ளது. பிரதமர் ஹரிணி அமரசூரிய உள்ளிட்ட அமைச்சர்கள் அமைச்சரவையும் இந்த மனுவில் பிரதிவாதிகளாகப் பெயரிடப்பட்டுள்ளனர்.

கண்டி நீதிமன்ற வளாகத்திற்கு அருகாமையில் அமைந்துள்ள தனது அலுவலகம்  , சூறாவளியால் ஏற்பட்ட வெள்ளப்பெருக்கின் விளைவாக   முற்றிலுமாக சேதமடைந்துள்ளதாகவும் மனுதாரர் கூறினார். தனது கணினி அமைப்பின் முழு தரவுத்தளத்தையும் இழந்துவிட்டதாகவும், இது தனது தொழில்முறை கடமைகளை நிறைவேற்றுவதற்கு விலைமதிப்பற்றது என்று அவர் குறிப்பிட்டுள்ளார்.

பிரதிவாதிகளின், செயலற்ற தன்மை மற்றும் புறக்கணிப்புகள் அறியாமை மற்றும் அலட்சிய அணுகுமுறையை வெளிப்படுத்துகின்றன, இது பேரிடர் தயார்நிலை மற்றும் மேலாண்மை சூழலில் அவர்களின் சட்டரீதியான மற்றும் அரசியலமைப்பு கடமைகள் மற்றும் செயல்பாடுகளை மீறுவதாகும்.

சூறாவளி குறித்த முன்கூட்டியே எச்சரிக்கைகள் இருந்தபோதிலும், கொத்மலை போன்ற முக்கிய நீர்த்தேக்கங்களில் இருந்து முன்கூட்டியே தண்ணீரை வெளியேற்றுவது உட்பட முன்கூட்டியே தணிப்பு நடவடிக்கைகளை எடுக்க பிரதிவாதிகள் தவறிவிட்டதாக மனுதாரர் தனது மனுவில் குறிப்பிட்டள்ளார்.

 கம்பளை போன்ற பகுதிகளில் வெள்ளம் உட்பட கீழ்நிலை தாக்கத்தை இத்தகைய நடவடிக்கைகள் கணிசமாகக் குறைத்திருக்கலாம் என்றும், விரிவான உயிர் இழப்பு மற்றும் சொத்து சேதத்தைத் தவிர்த்திருக்கலாம் என்றும் அவர் வலியுறுத்துகிறார்.

மேலும், மகாவலி நதியின் பெருக்கெடுப்புக்கு, விக்டோரியா நீர்த்தேக்கத்தின் வான் கதவுகள் தொடர்ந்து மூடப்பட்டு, நடைமுறையில் உள்ள பேரிடர் மேலாண்மை நெறிமுறைகளின்படி தேவையான அளவு தண்ணீரை வெளியேற்றாமல் இருந்ததே காரணம் என்று குற்றம் சாட்டப்பட்டுள்ளது.

கலஹா, பேராதனை மற்றும் கண்டி உள்ளிட்ட பாதிக்கப்பட்ட பகுதிகளின் நீர் வெளியேற்றம் மற்றும் நீரோட்டம், பொது மற்றும் தனியார் சொத்துக்களுக்கு, குறிப்பாக கண்டி நீதிமன்ற வளாகம் மற்றும் பேராதனை பல்கலைக்கழகத்திற்கு கடுமையான சேதத்தை ஏற்படுத்தியதாக மனுதாரர் கூறுகிறார். இந்த நிலைமை அளவிலும் தாக்கத்திலும் முன்னோடியில்லாதது என்று அவர் சுட்டிக்காட்டியுள்ளார்.

வரவிருக்கும் இயற்கை பேரிடருக்கு பதிலளிப்பதில் உரிய விடாமுயற்சியுடனும் தொலைநோக்குப் பார்வையுடனும் செயல்படத் தவறியதால், அரசியலமைப்பின் கீழ் உத்தரவாதம் அளிக்கப்பட்ட தனது அடிப்படை உரிமைகள் பிரதிவாதிகளால் மீறப்பட்டுள்ளதாக அம்மனுவில் குறிப்பிட்டுள்ளார்.