டிபென்டர் மோதிய சம்பவம்: 8 பேர் கைது

பம்பலப்பிட்டி- டுப்ளி புல்லர்ஸ் சந்தியில் நேற்று அதிகாலை (24) இடம்பெற்ற வாகன விபத்து தொடர்பில் 8 சந்தேகநபர்கள் கைதுசெய்யப்பட்டுள்ளனர்.

நேற்று அதிகாலை பொரளை பொலிஸ் நிலைய போக்குவரத்து பொறுப்பதிகாரி மீது மோதிய டிபென்டர் வாகனம் பிரதேசத்திலிருந்து தப்பிச் சென்ற நிலையில், இது தொடர்பில் நாடாளுமன்ற உறுப்பினர் மஹிந்தானந்த அளுத்கமகேவின் மகன் உள்ளிட்ட 8 பேர் கைதுசெய்யப்பட்டுள்ளனர்.

நாடாளுமன்ற உறுப்பினர் மஹிந்தானந்த அளுத்கமகேவின் மகனும் கொழுப்பு மாநகர சபை உறுப்பினர் துமிந்த சுதம்மிக ஆட்டிகல ஆகியோர் விபத்துக்குள்ளான டிபென்டரில் பயணித்துள்ளனர்.

அத்துடன் விபத்தை ஏற்படுத்திய ​டிபென்டர் வாகன சாரதியும் இதன் உரிமையாளரும் கைது செய்யப்பட்டுள்ளதுடன், இந்த டிபென்டர் வாகனத்துடன் பயணித்த மற்றுமொரு சொகுசு வண்டியில் பயணித்த மேலும் 4 சந்தேகநபர்களும் குற்றங்களையும் சாட்சிகளையும் மறைத்த குற்றச்சாட்டின் கீ​ழ் கைதுசெய்யப்பட்டுள்ளதாக பொலிஸ் ஊடகப் பேச்சாளர் தெரிவித்துள்ளார்.

கைதுசெய்யப்பட்ட சந்தேகநபர்கள் 23- 28 வயதுக்கு இடைப்பட்டவர்களென்றும் இவர்கள் இன்றைய தினம் புதுக்கடை இலக்கம் 3 நீதவான் நீதிமன்றில் ஆஜர்படுத்தப்படவுள்ளனரென்றும் தெரிவிக்கப்பட்டுள்ளது.