இரண்டாவது நாளாக தொடரும் திருமலை மின்சாரசபை ஊழியர்களின் பணிப்பகிஷ்கரிப்பு

(எஸ்.எஸ்.குமார்.அப்துல்சலாம் யாசீம்)

திருகோணமலையில் இலங்கை மின்சாரசபை  ஊழியர்கள் மேற்கொண்டு வரும் பணிப்பகிஷ்கரிப்பு இன்று செவ்வாய்க்கிழமை இரண்டாவது நாளாகவும் தொடர்ந்து நடைபெறுகிறது.

திருகோணமலையில் இலங்கை மின்சாரசபை ஊழியர்களை தாக்கியவர்கள் மீது பொலிஸார் உரிய நடவடிக்கை எடுக்குமாறு வலியுறுத்தி நேற்று திங்கட்கிழமை முதல் இலங்கை மின்சாரசபை ஊழியர்கள் பணிப்பகிஷ்கரிப்பில் ஈடுபட்டு வருகின்றனர்.

இன்றையதினம் நண்பகல் 12.30 மணியளவில் மணிக்கூட்டுக் கோபுரத்திற்கு முன்னால் ஒன்றுகூடிய இலங்கை மின்சாரசபையைச் சேர்ந்த சுமார் 70 ஊழியர்கள் எதிர்ப்பு நடவடிக்கைகளிலும் ஈடுபட்டனர்.

'தம்மீது தாக்குதல் நடத்தியவர்களை பொலிஸார் உடனடியாக கைதுசெய்ய வேண்டும்', 'சுதந்திரமாக செயற்படுவதற்கு ஏற்ற சூழல் உருவாக்கப்பட வேண்டும்', 'ஊழியர்களுக்கு பாதுகாப்பு வழங்கப்பட வேண்டும்' போன்ற கோஷங்களை எழுப்பியவாறு இலங்கை மின்சாரசபை ஊழியர்கள் ஆர்ப்பாட்டத்தில் ஈடுபட்டு வருகின்றனர்.