"ஆசிரியர் சமமின்மையை போக்கவே கிழக்கில் கொள்கை ரீதியான இடமாற்றம்"

(அமதோரு அமரஜீவ)

கிழக்கு மாகாணத்தில் நிலவும் ஆசிரியர் சமமின்மை நிலையை போக்கும் முகமாகவே இம்மாகாணத்தில் ஆசிரியர் இடமாற்றம் என்ற கொள்கை ரீதியான தீர்மானமொன்றை எடுக்க வேண்டி ஏற்பட்டதாக மாகாண ஆளுநர் மொஹான் விஜயவிக்கிரம தெரிவித்தார்.

கிழக்கு மாகாணத்தின் சில கல்வி வலயங்களில் ஆசிரியர் பற்றாக்குறை காணப்படும் அதேவேளை, மேலும் சில கல்வி வலயங்களில் மேலதிகமான ஆசிரியர்கள் கடமையில் ஈடுபட்டுள்ளனர். இதனால் ஏற்பட்டுள்ள ஆசிரியர் சமமின்மை பிரச்சினைக்கு தீர்வு காணவே மேற்படி தீர்மானம் எடுக்கப்பட்டிருந்ததாகவும் அவர் குறிப்பிட்டார்.

இது தொடர்பில் கிழக்கு மாகாண ஆளுநர் மேலும் குறிப்பிடுகையில், 'கிழக்கு மாகாணத்தில் ஆசிரியர் சமமின்மை பிரச்சினைக்கு தீர்வு என்ற அடிப்படையில் ஆசிரியர்களுக்கு இடமாற்றங்களை மேற்கொள்வதற்காக இடமாற்றக் குழுவொன்று ஏற்படுத்தப்பட்டது.

இருப்பினும் குறித்த குழுவினால் இந்த இடமாற்ற நடவடிக்கை முன்னெடுக்கப்படவில்லை. அதனால் நிர்வாக ரீதியான இடமாற்ற நடவடிக்கையினை முன்னெடுப்பதற்கான தேவை ஏற்பட்டது.

அத்துடன், கிழக்கு மாகாண ஆசிரியர்களில் சிலர் காலநேர அட்டவணையின்றி வேலைசெய்யாதிருந்து சம்பளம் பெற்று வருகின்றனர். இதனால் அரசாங்கத்தின் நிதி வீனடிக்கப்படுகிறது. இந்த ஆசிரியர் சமப்படுத்தல் நடவடிக்கையின் மூலம் அரச நிதி வீனடிக்கப்படாது உரிய முறையில் பயன்படுத்தப்படும். இக்காரணங்களைக் கருத்திற் கொண்டே மேற்படி ஆசிரியர் இடமாற்றங்கள் மேற்கொள்ளப்பட்டன' என்று அவர் மேலும் தெரிவித்தார்.