மறைந்த உறுப்பினரின் பெயரில் வீதி

வடமலை ராஜ்குமார்

சோனகவாடி வட்டாரத்தில் உள்ள வீதிக்கு, திருகோணமலை நகராட்சி மன்றத்தின் உறுப்பினராக இருந்து மறைந்த  அமரர் ச.சனூனின் பெயரை சூட்ட சபையில் தீர்மானம் நிறைவேற்றப்பட்டுள்ளது.

திருகோணமலை நகராட்சி மன்றத்தின் ஐக்கிய தேசிய கட்சியின் உறுப்பினராக சோனகவாடி வட்டாரத்துக்கு தெரிவாகி செயற்பட்டு வந்த ஜனாப் சனூன், கொவிட் தொற்றுக் காரணமாக மரணமடைந்தார்.

திருகோணமலை நகராட்சி மன்றத்தின் 42ஆவது சபைக் கூட்டம், தலைவர் நா.இராஜநாயகம் தலைமையில் நேற்று (28) இடம்பெற்ற போது, அன்னாருக்காக அஞ்சலி செலுத்தியதுடன், அவருக்கான இரங்கல் உரைகளும் உறுப்பினர்களால் நிகழ்த்தப்பட்டன.

அதனைத் தொடர்ந்து இடம்பெற்ற தலைவரின் உரையின் போது, தலைவரின் பிரேரனையாக அவருடைய வட்டாரத்தில் உள்ள வீதி ஒன்றுக்கு பதவியில் இருக்கும் போது உயிரிழந்த அமரர். ச. சனூனின் பெயரை சூட்டுவது என சபையால் ஏக மனதாக தீர்மானம் நிறைவேற்றப்பட்டது.