எட்டாமிடத்துக்கு முன்னேறினார் ஏய்டன் மர்க்ரம்

சர்வதேச கிரிக்கெட் சபையின் டெஸ்ட் போட்டிகளுக்கான துடுப்பாட்டவீரர்களுக்கான தரவரிசையில் எட்டாமிடத்துக்கு தென்னாபிரிக்காவின் ஏய்டன் மர்க்ரம் முன்னேறியுள்ளார்.

பாகிஸ்தானுக்கெதிரான மூன்றாவது டெஸ்டில் 111 ஓட்டங்களைப் பெற்றதைத் தொடர்ந்தே, 10ஆம் இடத்திலிருந்து இரண்டு இடங்கள் முன்னேறி எட்டாமிடத்தை மர்க்ரம் அடைந்துள்ளார். இதுதவிர, இப்போட்டியில் 112 ஓட்டங்களைப் பெற்ற தென்னாபிரிக்காவின் ஹஷிம் அம்லா, 13ஆம் இடத்திலிருந்து மூன்று இடங்கள் முன்னேறி 10ஆம் இடத்தை அடைந்துள்ளார்.

மேற்குறித்தவை தவிர, முதல் 10 துடுப்பாட்டவீரர்களின் தரவரிசையில் எவ்விதமாற்றமும் இல்லாத நிலையில் அத்தரவரிசை பின்வருமாறு,

1. விராத் கோலி, 2. கேன் வில்லியம்சன், 3. செட்டேஸ்வர் புஜாரா, 4. ஸ்டீவ் ஸ்மித், 5. ஜோ றூட், 6. டேவிட் வோணர், 7. ஹென்றி நிக்கொல்ஸ், 8. ஏய்டன் மர்க்ரம், 9. திமுத் கருணாரத்ன, 10. ஹஷிம் அம்லா.

இதேவேளை, முதல் 10 பந்துவீச்சாளர்களின் தரவரிசை பின்வருமாறு,

1. கஜிஸோ றபாடா, 2. ஜேம்ஸ் அன்டர்சன், 3. வேர்ணன் பிலாந்தர், 4. பற் கமின்ஸ், 5. இரவீந்திர ஜடேஜா, 6. ட்ரெண்ட் போல்ட், 7. மொஹமட் அப்பாஸ், 8. டிம் செளதி, 9. இரவிச்சந்திரன் அஷ்வின், 10. ஜேசன் ஹோல்டர்

இந்நிலையில், பாகிஸ்தானுக்கெதிரான மூன்று போட்டிகள் கொண்ட டெஸ்ட் தொடரை 3-0 என வெள்ளையடித்ததன் மூலம் நியூசிலாந்து, இங்கிலாந்தை பின்தள்ளி அணிகளுக்கான தரவரிசையில் இரண்டாமிடத்தை தென்னாபிரிக்கா பெற்றுள்ளது.

இதேவேளை, ஆறாமிடத்திலிருந்த பாகிஸ்தான் ஓரிடம் சரிந்து ஏழாமிடத்தைப் பெற்றுள்ளது.

அணிகளின் தரவரிசை பின்வருமாறு,

1. இந்தியா, 2. தென்னாபிரிக்கா, 3. இங்கிலாந்து, 4. நியூசிலாந்து, 5. அவுஸ்திரேலியா, 6. இலங்கை, 7. பாகிஸ்தான், 8. மேற்கிந்தியத் தீவுகள், 9. பங்களாதேஷ், 10. சிம்பாப்வே.