நான்காவது சுற்றுடன் வெளியேறினார் முகுருஸா

ஐக்கிய அமெரிக்காவின் புளோரிடாவில் இடம்பெற்றுவரும் மியாமி பகிரங்க டென்னிஸ் தொடரின் நான்காவது சுற்றுப் போட்டியுடன் உலகின் மூன்றாம் நிலை வீராங்கனையான கர்பைன் முகுருஸா தொடரிலிருந்து வெளியேற்றப்பட்டுள்ளார்.

ஸ்பெய்னின் கர்பைன் முகுருஸா, 3-6, 4-6 என்ற நேர் செட்களில் ஐக்கிய அமெரிக்காவின் ஸ்லோனே ஸ்டீபன்ஸிடம் தோற்றே தொடரிலிருந்து வெளியேறினார்.

இதேவேளை, உலகின் நான்காம் நிலை வீராங்கனையான எலினா ஸ்விட்டோலினா, ஐந்தாம் நிலை வீராங்கனையான ஜெலீனா ஒஸ்டபென்கோ ஆகியோர் தத்தமது நான்காவது சுற்றுப் போட்டிகளில் வென்று காலிறுதிப் போட்டிகளுக்கு தகுதிபெற்றுள்ளனர்.

உக்ரேனின் எலினா ஸ்விட்டோலினா, 7-5, 6-4 என்ற நேர் செட்களில் அவுஸ்திரேலியாவின் அஷ்லெய் பார்ட்டியை வென்றார்.

லத்தீவியாவின் ஜெலினா ஒஸ்டபென்கோ, 7-6 (7-4), 6-3 என்ற நேர் செட்களில் உலகின் ஒன்பதாம் நிலை வீராங்கனையான செக் குடியரசின் பெற்றா குவிட்டோவாவை வென்றார்.

இதேவேளை, உலகின் எட்டாம் நிலை வீராங்கனையான ஐக்கிய அமெரிக்காவின் வீனஸ் வில்லியம்ஸ், தனது நான்காவது சுற்றுப் போட்டியில் 5-7, 6-1, 6-2 என்ற செட் கணக்கில் நடப்புச் சம்பியனான ஐக்கிய இராச்சியத்தின் ஜொஹன்னா கொன்டாவை வென்று காலிறுதிப் போட்டிக்குத் தகுதிபெற்றார்.

இந்நிலையில், உலகின் ஐந்தாம் நிலை வீரரான ஜேர்மனியின் அலெக்ஸான்டர் ஸவ்ரேவ், தனது மூன்றாவது சுற்றுப் போட்டியில், 2-6, 6-2, 6-4 என்ற செட் கணக்கில் ஸ்பெய்னின் டேவிட் பெரரை வென்று நான்காவது சுற்றுக்குத் தகுதிபெற்றுள்ளார்.

இதேவேளை, உலகின் எட்டாம் நிலை வீரரான தென்னாபிரிக்காவின் கெவின் அன்டர்சன், தனது மூன்றாவது சுற்றுப் போட்டியில், 4-6, 6-2, 6-3 என்ற செட் கணக்கில் ரஷ்யாவின் கரென் காஷனோவ்வை வென்று நான்காவது சுற்றுப் போட்டிக்குத் தகுதிபெற்றுள்ளார்.