முதலாவது டெஸ்டில் ஆதிக்கம் செலுத்தும் அவுஸ்திரேலியா

மேற்கிந்தியத் தீவுகளுக்கெதிரான முதலாவது டெஸ்டில் அவுஸ்திரேலியா ஆதிக்கம் செலுத்துகிறது.

இரண்டு போட்டிகள் கொண்ட இத்தொடரில், பேர்த்தில் நேற்று ஆரம்பமான இந்த டெஸ்டின் நாணயச் சுழற்சியில் வென்ற அவுஸ்திரேலியாவின் அணித்தலைவர் பற் கமின்ஸ், தமதணி முதலில் துடுப்பெடுத்தாடும் என அறிவித்தார்.

அந்தவகையில் முதலில் துடுப்பெடுத்தாடிய அவுஸ்திரேலியா ஆரம்பத்திலேயே டேவிட் வோர்னரை ஜேடன் சியல்ஸிடம் இழந்தது. பின்னர் உஸ்மான் கவாஜாவும், மர்னுஸ் லபுஷைனும் இனிங்ஸ்கைக் கட்டியெழுப்பிய நிலையில் 65 ஓட்டங்களுடன் கைல் மேயர்ஸிடம் கவாஜா வீழ்ந்திருந்தார்.

இதைத் தொடர்ந்து லபுஷைன், ஸ்டீவ் ஸ்மித்தின் இணைப்பாட்டத்தில் பலமான நிலையிலுள்ள அவுஸ்திரேலியா, நேற்றைய முதல் நாள் முடிவில் 2 விக்கெட்டுகளை இழந்து 293 ஓட்டங்களைப் பெற்றுள்ளது. தற்போது களத்தில், லபுஷைன் 154 ஓட்டங்களுடனும், ஸ்மித் 59 ஓட்டங்களுடனும் ஆட்டமிழக்காமலுள்ளனர்.