யூரோ தகுதிகாண் போட்டிகள்: ஸ்பெய்ன், இத்தாலி வென்றன

அடுத்தாண்டு இடம்பெறவுள்ள ஐரோப்பிய கால்பந்தாட்டச் சங்கங்களின் ஒன்றியத்தின் யூரோ தொடருக்கான தகுதிகாண் போட்டிகளில் ஸ்பெய்ன், இத்தாலி உள்ளிட்ட அணிகள் வென்றுள்ளன.

தமது நாட்டில் இன்று அதிகாலை இடம்பெற்ற ஃபரோ தீவுகளுடனான குழு எஃப் போட்டியொன்றில் 4-0 என்ற கோல் கணக்கில் ஸ்பெய்ன் வென்றிருந்தது. ஸ்பெய்ன் சார்பாக, றொட்றிகோ, பக்கோ அல்கேஸர் ஆகியோர் தலா இரண்டு கோல்களைப் பெற்றிருந்தனர்.

இதேவேளை, ஃபின்லாந்தில் இன்று அதிகாலை இடம்பெற்ற அந்நாட்டுடனான குழு ஜே போட்டியொன்றில் 2-1 என்ற கோல் கணக்கில் இத்தாலி வென்றது. இத்தாலி சார்பாக, சிரோ இம்மொபைல், ஜோர்ஜினியோ ஆகியோர் தலா ஒவ்வொரு கோலைப் பெற்றிருந்தனர். ஃபின்லாந்து சார்பாகப் பெறப்பட்ட கோலை டீமு புக்கி பெற்றிருந்தார்.