சமூக சேவை உத்தியோகஸ்தர் சுடப்பட்டமைக்கு கண்டனம்

மட்டக்களப்பு நாவிதன்வெளி பிரதேச செயலகத்தில் சமூக சேவைகள் உத்தியோகத்தராக கடமையாற்றும் சச்சிதானந்தன் மதிதயன் கடந்த 26ஆம் திகதி சுட்டுக்கொலை செய்யப்பட்டமைக்கு வடக்கு மாகாண சமூக சேவைகள் உத்தியோகத்தர்கள் மற்றும் சமூக சேவைகள் அபிவிருத்தி உத்தியோகத்தர் சங்கம் ஆகியவை கண்டனம் வெளியிட்டுள்ளன.

வடக்கு, கிழக்கு மாகாணசபை இயங்கிய போது எம்முடன் இணைந்து பல வேலைத் திட்டங்களில் ஈடுபட்ட துடிப்பான இளைஞர். போர்க்காலத்திலும் போருக்கு பிந்திய காலத்திலும் நிறைந்த சமூக சேவைகளை நலிவுற்ற மக்களுக்காக ஆற்றிய ஒருவர்.

அன்னாரின் இழப்பால் துயருறும் குடும்பத்தவரின் இழப்பில் நாமும் பங்கெடுக்கிறோம் என அந்த அறிக்கையில் குறிப்பிடப்பட்டிருந்தது.

வெல்லாவெளி பொலிஸ் பிரிவுக்குட்பட்ட மண்டூர் கிராமத்திலுள்ள அவரது வீட்டில் தனது குடும்பத்தவர்களுடன் கடந்த செவ்வாய்க்கிழமை (26) உரையாடிக்கொண்டிருந்த வேளையில் மோட்டார் சைக்கிளில் வந்த இனந்தெரியாத நபர்கள் சிலர், அவர் மீது துப்பாக்கிச் சூட்டை மேற்கொண்டுவிட்டு தப்பிச்சென்றிருந்தமை குறிப்பிடத்தக்கது.