காத்தான்குடி தபால் நிலையத்தை தரமுயர்த்த நடவடிக்கை

கே.எல்.ரி.யுதாஜித், எம்.எஸ்.எம்.நூர்தீன்

காத்தான்குடி தபால் நிலையத்தை தரமுயர்த்த நடவடிக்கை எடுப்பதாக தபால் மற்றும் தபால் சேவைகள் அமைச்சர் அமைச்சர் ஹலீம் தெரிவித்தார்

காத்தான்குடி தபால் நிலையத்தை நவீன வசதிகளைக் கொண்ட தபால் நிலையமாக தரமுயர்த்துமாறு, அமைச்சர் எம்.எச்.எம். ஹலீமிடம் புனர்வாழ்வு மற்றும் மீள்குடியேற்ற இராஜாங்க அமைச்சர் எம்.எல்.ஏ.எம்.ஹிஸ்புல்லாஹ் விடுத்த கோரிக்கைக்கு அமைய, மேற்படி விடயம் சம்பந்தமாக உரிய நடவடிக்கை எடுக்குமாறு தபால் மா அதிபருக்கு, அமைச்சர் ஹலீம், நேற்று (08) பணிப்புரை விடுத்துள்ளார்.

இராஜாங்க அமைச்சர் ஹிஸ்புல்லாஹ், 1994ஆம் ஆண்டு தபால் மற்றும் தொலைத் தொடர்பு பிரதியமைச்சராக இருந்த போது காத்தான்குடியில் தபால் நிலையம் ஆரம்பித்து வைக்கப்பட்டது.

அப்போதைய யுத்த கால சூழலில் தபால் நிலையம் ஆரம்பித்து வைக்கப்பட்டமை மாபெரும் வெற்றியாக கருதப்பட்டதோடு, மக்களுக்கு பெரும் பயனுள்ளதாகவும் அது அமைந்திருந்தது. எனினும், அன்று முதல் இன்று வரை ஒரே தரத்தில் குறித்த தபால் நிலையம் இயங்கி வருகின்றமையால் அதனைப் பயன்படுத்துகின்ற பொது மக்கள், அரச சேவையாளர்கள் மற்றும் மாணவர்கள் பல்வேறு அசௌகரியங்களை எதிர்நோக்கி வருகின்றனர்.