சட்டவிரோத மணல் அகழ்வு; லொறி மீது துப்பாக்கிச் சூடு

சட்டவிரோதமாக மணல் அகழ்ந்து எடுத்துச் சென்ற லொறியை நிறுத்துமாறு பணித்தபோதும்,  அதனையும் மீறிச் சென்ற அந்த லொறி மீது, பொலிஸார்  துப்பாக்கிப் பிரயோகம் மேற்கொண்டுள்ளனர்.

இதனையடுத்து, லொறியை மடக்கிப்பிடித்த பொலிஸார், லொறி சாரதியைக் கைதுசெய்துள்ளனர்.

இச்சம்பவம், மட்டக்களப்பு – வாழைச்சேனை, காவத்தமுனை பிரதேசத்தில் நேற்றிரவு (14) இடம்பெற்றுள்ளதாக, வாழைச்சேனை பொலிஸார் தெரிவித்தனர்.

மாவட்ட விசேட பொலிஸ் புலனாய்வுப் பிரிவினர், காவத்தமுனை பகுதியில் வீதிச் சோதனை நடவடிக்கையை மேற்கொண்டிருந்தபோது,  லொறியொன்றில், சட்டவிரோதமாக மணல் எடுத்துச் சென்றமை அவதானிக்கப்பட்டுள்ளது.

இதன்போது, லொறியை நிறுத்துமாறு, மாவட்ட விசேட பொலிஸ் புலனாய்வுப் பிரிவினர் பணித்துள்ளனர்.

அதனையும் மீறி, சாரதி லொறியை செலுத்திச் சென்றபோது, லொறியின் ரயர் மீது துப்பாக்கிப் பிரயோகம் செய்து, லொறியை மடக்கிப் பிடித்து, சாரதியை கைது செய்தனர் என, வாழைச்சேனை பொலிஸார் மேலும் தெரிவித்தனர்.